Il racconto del weekend calcistico isolano in limba sarda a cura degli amici di Amistade.
Su Casteddu binchet s’iscudeto suo, sa sarvesa
Unu puntigheddu contras a su Torino fiat bastadu puru, ma sos sardos ant preguntadu de prus, e s’iscuadra at donadu de prus. Una bìnchida chi narat meda: cando sos torinesos ant signadu una rete galana a beru, cun Obradfor, a su minutu 36, cun Lecce e Cremonese ambas binchidoras, tando cale si siat iscuadra fiat pòdida rùere in sa tristura sua. Ma no l’ant fatu. Issos ant agatadu luego sa bona balia, duos minutos in fatu cun Esposito, bene cumbidadu dae Gaetano. A su 45+2 b’at pensadu Mina su mannu, in pari cun sa bona sorte. Bene bènnidu siat su ballitu e sa gana de festa de sa zente, in su logu e in su mundu intreu. A sa festa finale non podet mancare Pavoletti. Su capitanu restat in Casteddu o forsis nono. Seguru sa rete sua a su minutu 94 at a abarrare in s’istòria de sa Sardigna.
Sa Torres binchet sa finale de su playout e abarrat in sèrie C
Torrat a bìnchere sa Torres, cun mèritu nòdidu, in su Vanni Sanna custa borta. 3-1 in totu, lassat logu a pagos dùbbios e narat chi sa Brigada Tataresa, pro duos annos a curtzu a sa sèrie B, non meritaiat de nche falare in D. Oe podimus nàrrere chi est sa bìnchida de Sorrentino e de Di Stefano, sos bomber giamados pro acontzare su bàrriu in caminu, ma prus de totu a bìnchere est Mastru Greco, s’annu coladu bogadu a foras a caddu a s’àinu, e torradu a giamare ocannu pro parare su dannu fatu dae mastru Pazienza. Ma como non giuat a si pasare in sa glòria, tocat de incomintzare a traballare pro su tempus benidore.
Sèrie D sarda: s’Òlbia perdet sa D e su Monastir isperat in sa sèrie C
S’Òlbia si ponet su coro in paghe, mancari calicunu o calicuna faeddet de “ripescaggio”. Como cumbenit de cumprire su tempus passadu, e dae in cue traballare pro bìnchere s’amargura, e chircare sa bètia manna, impitada pro pòdere torrare a domo sua, chi de seguru no est s’Eccellenza. Tando, de ammentare sa festa manna in Monastir, chi binchet in Roma contras a su Trastevere e podet sighire a bisare sa sèrie C, pro sa prima borta.
Mario Bua Capitta, Amistade (cun su contivizu de s’Istituto Chircas)
