Il racconto del weekend calcistico isolano in limba sarda a cura degli amici di Amistade.
Su Casteddu timet a bolare e perdet duos puntos in Roma
Cumintzat bene sa partida contra a sa Roma, ma a sa fine isponet male meda: 4-2 pro sos romanos, posca chi Maldini a su minutu 82 aiat aparinadu su resurtadu a 2-2… Sa matessi cosa càpitat tando contra a sa Lazio, cando su Casteddu aiat in manu sa partida, sa Lazio apàrinat gràtzias a una giogada galana de unu campione che a Isaksen. Pustis amus bidu duas iscuadras chi ant sighidu a si la giogare cun coràgiu e dignidade, e su parègiu pariat cosa fata. Sos sardos a sa fine timent e tando su timore acudit e si faghet beru. B’at de nàrrere chi sa faddina arbitrale, chi at donadu a sa Lazio sa botza pro bìnchere, non fiat de pagu contu. E b’at de nàrrere puru chi sas faddinas in Itàlia non tocant belle mai sas iscuadras mannas, chi a pustis in Europa leant poddas mannas… Pensamus chi sas iscuadras minores in Itàlia diant dèvere preguntare àrbitros internatzionales. E gasi lompimus a sa cuarta pèrdida, una in fatu a s’àtera. B’at meda ite traballare pro mastru Pisacane, su tema at a èssere: Pitzinnos e sa Balentia issoro…
Pescara-Torres agabbat 0-0: sos sardos balanzant unu puntigheddu de oro
Sa Torres perdet a Mastinu ma abarrat sa balia. Sos abrutzesos, meres de su campu, atacant totu sa partida a cantu podent, ma non resessent a bìnchere, ca sos òmines de Greco giogant bene meda, a incomintzare dae su bardianu Zaccagno, sena ismentigare chi in s’Adriàticu si podet puru bìnchere. Tando sa gara isponet 0-0 e recuint totu paris cuntentos a domo.
Sèrie D, die iscura pro sas sardas, binchet su Budoni ebbia
Faghent puntos su Budoni, chi poddat 3-1 sa Vigor, e s’Ossese chi parègiat 1-1 in domo de sa Paganese. Su Late Durche perdet 0-2 in Tàtari contra a s’Albalonga, e perdent finas su Monastir, 4-2 in domo de sa UniPomezia, e su C.O.S. Sarrabus, 0-2 in su campu de sa Sarnese.
Mario Bua Capitta, Amistade (cun su contivizu de s’Istituto Chircas)
