Il racconto del weekend calcistico isolano in limba sarda a cura degli amici di Amistade.
Su Casteddu abarrat in su cabu de subra de sa classìfica
Isetende su bomber, torrat a signare Maldini, bator retes fintzas a como non podent èssere un’intzidente. Maldini comente totus sos campiones chi colant in Casteddu, agatat in Sardigna sa terra promissa. Namus puru chi est galu chito e devimus pasare chietos, ma su Casteddu non timet a bisare, mancu cando sa parte contrària si narat Juventus o chie si siat… tando sos torinesos cherent torrare a regnare, sa gana est manna, e si bidet bene dae s’oriolu de su mastru issoro, ma sos sardos ant pagu ite donare e a Nadale b’at galu tempus meda. Tzertu sa classìfica dae sa punta diat dèvere fàghere timore, sos giogadores parent abbistos e seguros, ischint chi si podet finas pèrdere, comente narat ogni isport, e chi semus solu a s’incomintzu, ischint bene chi non giuat a s’illudere, ma como est nòdidu chi si podet gherrare…
Sa Torres torrat sa podda a s’Atalanta U-23
Sunt colados duos annos, dae cando sos bergamascos fureint bisos e onore a sos tataresos, como su mundu est mudadu. Ammasedadu su Campobasso in domo issoro 1-1, sa Torres ammasedat s’Atalanta puru, cun Berto e Scotto in su primu tempus e resessit a faddire su rigore de su 3-0 in su segundu tempus cun Bunino, intradu in campu dae pagu. S’Atalanta aprofitat e a su minutu 83, gràtzias a s’ùnica faddina de Zaccagno, s’acùrtziat signende su 2-1, donende oriolu a sa zente e totu s’iscuadra. Tando Zaccagno si riscatat in sos minutos de recùperu, parende s’isconchinada de Bonanomi. Como sa zona est cussa de sos playoff e sa balia torrada a domo, narat chi si podet torrare a bisare.
Die iscura pro sa sèrie D sarda: binchet su Monastir ebbia
Su Monastir binchet duos a unu contra a su Latte Dolce, si pasat in su segundu logu de sa classìfica a unu puntu dae sa prima, sa Sarnese 1926, e nche lassat sos tataresos in su cabu de giosso de sa classìfica. Su Sarrabus non resessit a signare, e contra a s’Afragolese agabbat 0-0. S’Ossese apàrinat sa partida cun sa Venafro e imbetze non b’at nudda ite a fàghere pro su Budoni, chi perdet 3-0 in domo de sa Paganese, tertza in classìfica. Abarrat in sa parte bassa de sa classìfica paris a su COS Sarrabus e a su Latte Dolce.
Mario Bua Capitta, Amistade (cun su contivizu de s’Istituto Chircas)
