Il racconto del weekend calcistico isolano in limba sarda a cura degli amici di Amistade.
Su Casteddu faddit ma binchet
Sos noos non sunt prus tantu noos, Romano, Maldini e Winks paris cun chie est acudidu in antis in Sardigna o comente a chie b’est nùschidu, faeddamus de Deiola e àteros puru, donant seguresa a sa difesa e botzas de oro a s’atacu, isbatzinende prus de binti bortas a sa porta istranza, sarvada non solu dae Falcone, bardianu bene connotu, ma finas dae sa linna de sos palos. Podiant èssere istadas retes meda, ma est istada una ebbia cussa signada dae Maldini, e a sa fine sos sardos ant arriscadu meda a beru, tanchendesi in difesa, sena resessire a nch’essire. Podet èssere chi bi fiat su rigore puru, preguntadu a boghe manna dae sos pugliesos… si podet solu pensare chi devimus ismentigare sa glòria e imparare meda dae sas faddinas…
Sa Torres perdet sena gherrare meda… Grosetto – Torres 2-0
Su Grosseto oe pariat su Barcellona, contra a una Torres sena ideas e cun paga balia. Beru chi mancaiant giogadores de importu mannu, comente Mastinu, Zecca e àteros, beru est puru chi sos toscanos sunt piseddos meda e cun custu tempus sa balentia atlètica cheret nàrrere cosa meda, como abarrat solu sa chistione de comente agatare s’atza connota e sa balia pèrdida. Traballu meda pro Mastru Alfonso Greco, pro su tempus benidore…
Sèrie D sarda: s’Ossese non perdonat sos fradiles tataresos
Sa prima borta in sèrie D est glòria manna pro s’Ossese, chi binchet tres a zero contra a su Late Durche. Cumintzat bene finas su Monastir, binchende duos a unu in sa domo anzena de su Sarrabus. Nudda de ite a fàghere pro su Budoni contras a sa Sarnese 1926, e perdet duos a unu…
Mario Bua Capitta, Amistade (cun su contivizu de s’Istituto Chircas)
