Il racconto del weekend calcistico isolano in limba sarda a cura degli amici di Amistade.
Ite dannu!!! Maldini si bufat sa difesa friulana
A su tempus chi Maradona faghiat mannu su Nàpoli, allumaiat a sa sola su chelu azurru, prus de ogni àtera istedda. E puru sa vida sua in terra, non fiat neta de vìtzios…E puru niunu in Nàpoli, ne in àteru logu, s’at bisadu de lu punire… nemmancu sa FIFA a sa fine de sa carriera. Narant chi fiat drogadu, ma forsis issos cheriant magheddare s’Argentina…chie l’ischit? Como Maldini, nùmene nòbile de su fùbalu italianu, at fatu festa manna cun amigos e amigas, pro sa bìnchida in su de Bèrgamo, logu in ue l’ant cumpresu pagu, meda prus pagu de Casteddu, in ue sa zente, sighende su connotu lassat bìvere in paghe òmines e fèminas. Tando emmo, Maldini at guidadu, meda o pagu bufadu, isse at pèrdidu sa patente e devet imparare. Giustu. Totu s’àteru est imbìdia, ca cun su Casteddu Maldini torrat in Natzionale e donat dolores de conca a su podere isportivu italianu, Ammentamus semper chi su campionadu est longu meda, no giuat a s’illudere, ma traballare e bisare si podet…
Su Vanni Sanna est torradu fortesa tataresa, in fora de domo b’at galu ite fàghere…
Pro sa Torres, su 2-1 contra a sa Pianese, est istada sa tertza bìnchida una in fatu a s’àtera. Tataresos meres de su giogu, ma chi trement unu pagu a sa fine, comente a semper. Pro ite tando? Mastru Greco bi devet pensare unu pagu.
Ca contra a su Forlì cando sunt colados 6 minutos ebbia, Di Stefano, bene imbucadu dae Scotto, che bomber beru non faddit. Sa Torres est mere de sa partida, giogat in Forlì comente chi siat in domo sua, ma cando su tempus s’acùrtziat a sa fine, incomintzat a tìmere…e a su minutu 79 si lassat trampare dae Coveri e pustis devet trèmere, fintzas a sa fine.
Sèrie D sarda: prima pèrdida pro s’Ossese
S’Unipomezia faghet torrare s’Ossese cun sos pees in terra. Una domìniga in ue su Budoni torrat a bìnchere 2-0 contra a s’Anzio e su Monastir poddat 2-1 s’Aranova. Su Sarrabus aparinat in domo de s’Albalonga, ma est semper prus iscuru pro su Late Durche, chi perdet 1-2 in Tàtari contra a su Città di Anagni, e abarrat ùrtima in sa parte de giosso.
Mario Bua Capitta, Amistade (cun su contivizu de s’Istituto Chircas)
