Pitìcca sa rete ‘e Piccoli!!! Casteddu torra binchidòre in domus sua
Sa bìnchida còntra sos venetos abberit jannas nòvas, donat cuss’ animu gherradore, impitadu pro falare in campu còntra sos fortes, a incomintzare dae Fiorentina e Atalanta, ‘ischende bene, chi sos sardos como pius de innanti, ponnent a currere bàlia e coragiu nou. Un’iscuadra chi potet lassare in panchina , giogadores comente Gaetano, Prati e Jankto, pro lassare logu a piseddos chi si narant Felici, chi s’accherant bellu a bellu in serie A, est una cumpantzia bera. Promitit de tribagliare pro sa die de oe, ma pro su tempus benidòre puru.
Olbia torràt a bìnchere in domo sua
Su tribagliu de su mastru nou, connottu comente Zè Maria, icomintzat a donare frutos saboridos. Sa bìnchida 2-1 in domo terranoesa còntra Terracina, allumat s’isperu de una salvesa deretta. In s’annu pius iscuru de s’istoria de sa fùbbal olbiesa, bida s’edade de sos giogadores, annuntziant unu coju nou tra s’assotziu e sa Tzitade, in nomene de una promissa, de torrare luego a su logu, chi Olbia meritàt.
Sa Torres pèrdet un’àteru trènu in sa cùrsa pro sa serie B
Si subra sa serie B si potet galu bisare, tando tocàt de lu fàghere. Mastinu, omine de gabbale e cun esperientzia manna si fàghet lampare in-foras, cun s’ingenuidade de unu pitzinnu putzone e Tatthari frusciat a cantu potet, sos piseddos suos, chi pro demeritu e malasorte puru ant lassadu logu a sa bìnchida toscana. Ite cheret narrere totu custu? Beru chi s’ierru est fritu, longu e iscuru ma no giuat a brigare, metzus a aunìre sas energìas, ca su ‘eranu est incue accurtzu e b’est galu su tempus pro torrare vintzentes.
Mario Bua Capitta, Amistade
