Il racconto del weekend calcistico isolano in limba sarda a cura degli amici di Amistade.
Su Casteddu binchet sa tertza, una fatu a s’àtera: Casteddu -Verona 4-0.
Sos sardos sunt fraighende un’iscuadra pro giogare in su cabu de subra de sa sèrie A, sighende unu progetu nou, cun balia e dignidade. Su Casteddu, in caminu, at pèrdidu tres giogadores titulados, solu pro sa malasorte, sena si firmare a pranghere meda e at sighidu a investire in identidade, semper prus nòdida e lughente. Sos òmines, seberados dae mastru Pisacane donant in campu, ambos balia e ischire, tando cussos chi abarrant in sa panca faghent sa matessi cosa cando tocat a issos a giogare, in cale si siat momentu de sa partida. Est una cara noa chi tucat dae Ranieri, contivizada dae Nicola, finas a lòmpere a Pisacane, chi podet bantare su caminu fatu in Casteddu, non solu comente giogadore, ma puru comente mastru de sos pitzinnos chi impare a isse ant bìnchidu sa Copa Itàlia un’annu faghet. Niunu at postu aficu cun totus custos giòvanos impare comente est fatende Pisacane. E tres de sa bator retes signadas contras a su Verona sunt òperas mannas de pitzinnos puzones: Kilicsoy, Sulemana e Idrissi, casteddaju pesadu in domo. Paret sa sèmida bona, pro torrare a sos tempos de Gigi. De seguru no est fàtzile, ma si podet faghere.
Sa Torres binchet duos a zero in domo anzena
Tres puntos de oro pro sos Tataresos, e partida positiva nùmeru oto. Mastru Greco aiat pagos segretos: a Terni tucamus impare, totus cun sa matessi idea de bìnchere, e bìnchidu ant. Ternana – Torres 0-2. Zaccagni si faghet a muru, chi sos umbros non resessent a nche brincare. Diakite violat sa porta de sa Ternana cun unu rigore galanu e a pustis bi pensat Liviero a serrare sa partida a su minutu 85. Sa Torres lompet a 20 puntos che a su Perugia e torrat a bisare sa sarvesa dereta.
Sighit s’ierru in sa sèrie D sarda
Sa Scafatese non tenet piedade e su Sarrabus perdet 3-0. Podda manna finas pro su Tàtari Latte Dolce, 2-0 contras a su Flaminia, Su Budoni sena isperu perunu in su de Albalonga. S’òlbia imbetze perdet 2-3 in domo sua contras a sa Nocerina. Sa partida de su Monastir contras a su Valmontone benit rinviada pro su tempus malu.
Mario Bua Capitta, Amistade (cun su contivizu de s’Istituto Chircas)
