Il racconto del weekend calcistico isolano in limba sarda a cura degli amici di Amistade.
Su Casteddu non timet s’Atalanta: 3-2
Su Casteddu giogat bene e ponet a frutu sa balia cun duas retes in sos primos minutos. Bi pensat semper Mendy, pitzinnu senegalesu de su 2007, bene connotu dae Pisacane, chi l’at pesadu in Casteddu dae minore. Est sa prima partida cumintzada dae su primu minutu, in ue l’amus bidu in campu dae s’incumintzu. E li bastat unu minutu ebbia pro signare sa prima rete. Isconchinada galana chi torrat sa dea cun sos pees in terra. A su minutu 8 torrat a signare, che unu leone in mesu de àrea. Pustis, su Casteddu comente est capitadu àteras bias si dormit unu pagu, ligadu e presu dae su timore, e in antis de agabbare su primu tempus s’Atalanta agatat sa retes impitadas pro aparinare su resurtadu 2-2. In su segundu tempus sos sardos torrant a sa balia connota e Borrelli intradu tando dae sa panca, si leat su riscatu dae sas malas paràulas donadas dae carchi “tifosu” e che un’astore signat sa rete de su 3-2, chi abbarrat fintzas a sa fine. Totu cun s’agiudu de Sant’Elia, unu bardianu de mantènnere in s’iscuadra pro su tempus benidore…Ca sa sèrie A como, no est prus utopia.
Sa Torres perdet sa sarvesa dereta in sue Arezzo, ma custu s’ischiat
In domo anzena, in ue prus de oto miza persones prenant su campu, sos sardos bi proant cun totu sa balia connota, ma non bastat, sa partida pro s’Arezzo cheriat nàrrere sèrie B, a pustis de sèighi annos. E pro sa fortesa toscana est torra sèrie B. Pro s’iscuadra tataresa, como incomintzat un’àteru campionadu, si narat play-out e in cue onzi faddina podet èssere s’ùrtima. S’inferru de sa sèrie D, riet a sa moda de s’antigòriu, ma sa Torres at òmines balentes, e tando si podet galu sarvare.
Sèrie D sarda: die lughente pro sas sardas
S’Òlbia binchet in Terranoa 2-1 contras a s’Anzio e balanzat su diritu de si giogare sa sarvesa in sos play-out. Su Budoni puru faghet sa parte sua e binchet 1-0 in domo de su Flaminia. Su Latte Dolce poddat 4-2 su Cassino e su Monastir binchet 1-0 contras a sa Nocerina. Sa C.O.S. Sarrabus binchet in domo de su Valmontone. Prima de sas sardas est semper su Monastir cun 50 puntos.
Mario Bua Capitta, Amistade (cun su contivizu de s’Istituto Chircas)
