Il racconto del weekend calcistico isolano in limba sarda a cura degli amici di Amistade.
Su Casteddu si devet ismentigare su cabu de subra de sa classìfica
Sa partida contra a su Bologna deviat èssere cussa de su riscatu, ma s’ischiat bene chi non fiat cosa de pagu contu. Sos emilianos sunt iscuadra bilantziada bene in onzi contivizu e tando s’annu coladu puru nos at poddadu in domo. Gasi comente s’ischiat bene chi sa tzucada cun trèighi puntos, non podiat èssere bera de su totu…Isetaiamus una ruta e cussa est acudida. E como, tocat de acontzare su bàrriu in sa capitale, prima contra a sa Roma e a pustis contra a sa Lazio… Namus puru, chi si non giuat a s’illùdere cando totu andat bene, como tocat de sighire a bisare, lassende-nche in fora s’ala de manca de sa classìfica.
Torres-Guidonia 2-0: sos sardos binchent sa malasorte
Sa Torres sighit su caminu ditzosu in su girone B de sa sèrie C. Mancantes Di Stefano e Kebbeh, sos sardos perdent puru s’agiudu de Mastinu, chi ruet male e devet lassare su campu a sa mesora de su primu tempus. Paret torrada sa malasorte. Ma sos tataresos non perdent sa balia e guidant sa partida sena timore e cun Bonino e Carboni tancant sos contos e ponent in sa bèrtula tres puntos de oro, chi donant paghe e su diritu de bisare sos play off. Sa zente recuit a domo cuntenta, pensende a su Pescara.
Sèrie D sarda: in paris su derby Ossese-Budoni: 2-2
Unu puntu peròmine tra Ossese e Budoni, parègiant puru su Monastir in domo sua contra a su Trastevere e su Late Durche in domo de su Vigor. Binchet su Sarrabus ebbia, e binchet bene meda, 3-0 contra a su Gelbison.
Mario Bua Capitta, Amistade (cun su contivizu de s’Istituto Chircas)
