Sos briantzolos torrant s’iscuadra sarda a pees in terra
Mancat su bomber e su Casteddu faddit gasi sas retes in su primu tempus e su Monza nde aprofitat, sena torrare su praghere. E Sant’Elia s’ismèntigat sos miràculos. In sa panca mancat su mastru mannu, a dolu mannu se sa balia. Mancat su fàmene de chie devet bìnchere su campionadu de prus importu: sa sarvesa. Bator retes a zero est meda, ma podet fàghere de energia pro su tempus benidore, narat chi s’iscuadra devet galu mezorare si cheret abarrare fintzas a sa fine in s’ala de manca de sa classìfica.
Sa Torres giogat bene ma perdet sa partida: Reggiana – Torres 2-0
A sos tataresos mancaiant òmines de importu mannu pro s’iscuadra, e totu ischimus chi sos emilianos ant giogadores de àteru livellu, ma sos sardos non si sunt cuados o tancados in difesa. Sa linna de su palu at sarvadu sos meres de domo, guidados dae Tesser, cando Di Stefano at isbatzinadu dae fora de s’àrea e a sa fine de su primu tempus sos emilianos ant tancadu sa partida, cun Sipos e Portanova. Ma Mastinu e sos cumpanzos non si sunt mai pèrdidos de ànimu e ant sighidu a chircare sa rete, tantu chi su bardianu de domo est istadu premiadu comente su menzus òmine in campu. Tando b’at semper meda ite imparare, ma sa balia b’est.
Su Monastir perdet ma abarrat segundu, paris a su Vigor
Su Monastir perdet 3-2 in domo de su Vigor. Perdent puru su Budoni, 4-2 in domo sua contra a s’Albalonga e su Sarrabus, 3-2 in su de Trastevere. Perdet finas s’Ossese, 2-1 in fora de domo sua contra a su Gelbison. Domìniga rànchida pro sas sardas, solu su Late Durche balanzat unu puntigheddu, paregende 1-1 in domo sua contra a s’Anzio.
Mario Bua Capitta, Amistade (cun su contivizu de s’Istituto Chircas)
