Il racconto del weekend calcistico isolano in limba sarda a cura degli amici di Amistade.
S’Inter est tropu mannu pro su Casteddu: 3-0
Su Casteddu giogat bene e tenet su leone tancadu in su cuile pro totu su primu tempus. Palestra a s’incumintzu aiat pòdidu puru signare sa prima rete, cando at collidu su cumbidu galanu de Borrelli, ma s’isbatzinada nch’est bolada in tribuna. S’istòria mudat in su segundu tempus, cando Barella leat in manu sa brìllia de s’iscuadra. Totus ischimus cantu Barella podet mudare sa partida, in Itàlia. Isse incomintzat sa giogada chi lompet a su primu gol de Thuram e pustis faghet totu a sa sola, rupet in àrea e lassat andare un’archibusada, chi non lassat isperu perunu a Caprile. Pro unu momentu su sardu desizat chi sa rete sua non carret sa sèrie B pro s’iscuadra chi l’at pesadu. “The show must go on”, narat Zielinski a su 90+2. E sunt 3-0. Como sos milanesos torrant cuntentos a domo issoro.
Sa Torres balanzat unu puntu, ma perdet sa sarvesa dereta
In domo sua, sos sardos, paris a sa zente chi prenat su campu, bi proat cun totu sa balia connota, ma non bastat, su Gubbio si faghet a fortesa. Aguantat a s’atacu mannu de sa brigada tataresa e a sa fine proat puru a bìnchere. Zaccagno sarvat sa porta sua cun balia, cando fiat giai coladu su minutu 90. Como sa Torres si giogat sa sarvesa dereta in domo de s’Arezzo, s’ùrtima die de su campionadu. Pro s’Arezzo diat chèrrere nàrrere sèrie B. Nos isetat una bella partida.
Sèrie D sarda: s’Òlbia torrat a bìnchere
S’Òlbia acontzat su bàrriu e binchet 3-2 in Terranoa contras a su Trastevere, sa segunda de su campionadu. Su Budoni puru faghet sa parte sua, binchende 1-0 contras a sa Lodigiani. Su Latte Dolce est “pirata” in domo de su Montespaccato e binchet 0-1. Puntigheddu bonu finas pro su Monastir in domo de s’Albalonga. Custa Domìniga de sas Sardas perdet solu sa C.O.S. Sarrabus, in domo de su Real Monterotondo.
Mario Bua Capitta, Amistade (cun su contivizu de s’Istituto Chircas)
