Il racconto del weekend calcistico isolano in limba sarda a cura degli amici di Amistade.
Su Casteddu binnennat in Firenze: Fiorentina – Cagliari 1-2
Sos sardos assentant sa difesa e binchent in s’Artemio Franchi. Sa Fiorentina, comente sa Juventus, at fraigadu un’iscuadra pro giogare in su cabu de subra e at fatu su passu prus longu de s’anca. Su Casteddu at negadu sa pregunta a mastru Nicola pro unu progetu de coràgiu (chi cheret nàrrere dinari), donende logu a s’idea de investire in gioventude isportiva, cumbidada dae mastru Pisacane, chi òmine abbistu comente est no at ismentigadu sos mannos. Tando sa presèntzia de giogadores comente a Mina, Luperto e Pavoletti, impare a totus sos pitzinnos, est de impitu mannu pro fàghere nàschere un’iscuadra noa, pro nche pigare dae sa A2 a su cabu de sa A1. Comente a sos tempos de Gigi. Semper cun umiltade manna, ma sena ismentigare chi si podet fàghere.
Sa Torres binchet un’àteru puntigheddu e nde perdet duos
Tertzu parègiu, unu in fatu a s’àteru pro sos Tataresos, e partida nùmeru sete chi andat a manera positiva, una in fatu a s’àtera o pro nàrrere menzus sena pèrdere. Custa pro sos Sardos fiat una partida de bìnchere. In italianu si narat “scontro diretto”, pro nche brincare a fora dae sos play-out. Ma in campu falant semper, ùndighi òmines contras a ùndighi, e tando namus puru chi su Bra at fatu sa partida sua, signende a primu e ghiende su giogu pro totu su primu tempus. Su segundu l’at giogadu menzus sa Torres e sa fine at àpidu finas sas ocasiones pro covecare sa partida. Sas faddinas chi ant impedidu sa bìnchida, si podet nàrrere siant unu pagu pro timore, timore de bolare. Greco est unu mastru, isse connoschet bene su logu, s’iscuadra e prus de totu sa conca de sos òmines suos. A sa conca de s’iscuadra podet e devet traballare.
Die iscurosa, solu su Tàtari Latte Dolce onorat sa sèrie D sarda
Òlbia torrat a pèrdere e como est solu a duos puntigheddos dae s’inferru. Budoni perdet in domo sua contras a sos primos de su girone, sa Scafatese, e devet ismentigare sos bisos de glòria, gasi comente su Sarrabus, chi benit poddada in domo sua, 0-2 dae su Flaminia. Perdet finas su Monastir in domo de su Cassino, narende chi semus iscuadras chi pro como podent abbaidare solu a sa mesania de sa classìfica.
Mario Bua Capitta, Amistade (cun su contivizu de s’Istituto Chircas)
