Il racconto del weekend calcistico isolano in limba sarda a cura degli amici di Amistade.
Su Casteddu giogat bene ma perdet
Su Casteddu guidat sa partida cun balia manna ma sa sorte narat chi nono e sa bròcia non rupet sa linia de sa porta anzena, tando s’Udinese cun duos tiros contados binchet 2-0 e lompet a 50 puntos. B’aiat finas unu rigore, prima donadu e pustis negadu, ca, comente narat s’àrbitru, su bratzu de sa difesa friulana fiat in “positzione naturale”. Tando sa zente si preguntat ite fiat capitadu si in parte de su Casteddu, aiat àpidu giogadu sa Juve o s’Inter…Nois de Amistade sighimus a nàrrere chi sa lega diat dèvere pensare a preguntare àrbitros internatzionales, comente natzione ma puru regione ispetziale e lìbera cantu a su Galles o a s’Iscòtzia…Como abarrant duas partidas pro balanzare unu puntigheddu de sarvesa matemàtica.
Sa Torres binchet sa prima finale de sos playout: Bra-Torres 0-1
Binchet sa Torres, cun mèritu nòdidu, in su campu de Sestri Levante, gràtzias a una rete galana de su sitzilianu Di Stefano, chi lompet a deghe retes in cussa chi pro isse est sa prima annada tataresa. Sos sardos ponent in campu balia, connoschèntzia e caràtere forte che fèrula, totu narat chi s’iscuadra mèritat de istare in sèrie C. Ma como non giuat a si pasare in sa glòria, ca cussu de sàpadu 16 in su Vanni Sanna est s’abboju de su destinu finale.
Sèrie D sarda: s’Òlbia perdet sa finale
S’Òlbia ponet su coro in campu, signat cun Putzu e agabbat su primu tempus binchende 1-0. Ma non bastat. In su segundu tempus bi pensat Belloni a covecare sa gara e a cumprire sa remontada de s’Ischia. S’iscuadra terranoesa perdet sa sèrie D e custu cheret nàrrere “Eccellenza”, esperièntzia chi mancaiat dae su 2013. Sos bisos lassant logu a s’amargura, ma s’isperu non morit mai. Dae sa chijina si podet torrare a nàschere. Die de ammentare e festa manna pro su Monastir, chi aparinat 3-3 sa partida cun su Flaminia, e balanzat sa finale de sos playoff.
Mario Bua Capitta, Amistade (cun su contivizu de s’Istituto Chircas)
