Il racconto del weekend calcistico isolano in limba sarda a cura degli amici di Amistade.
Casteddu – Juventus 1-0
Sos sardos binchent e sos piemontesos torrant a domo issoro pranghende, custu narat su campu. Cantas bias su Casteddu at pèrdidu sa partida finas gioghende menzus e a pustis a prantu pro sa mala sorte? Beru est chi sa Juventus at atacadu pro 80 minutos subra a 96, comente est beru chi sos torinesos ant mantesu sa bròcia su 75% de su tempus. Tando totus ischimus chi sa Juve at fraigadu un’iscuadra de campiones connotos in su mundu intreu, ma su Casteddu sena s’ismentigare nudda de totu custu e pensende a tancare sos àidos pro si difèndere dae s’atacu istranzu, at mantesu biu unu valore mannu in su fùbalu e in onzi isport de su mundu, at sighidu a bi crèere da s’incomintzu fintzas a sa fine. E Mazzitelli, òmine bènnidu dae Como e chi pro bona parte de su girone de andada at caentadu sa panchina a sa muda, no at frazadu su cùmbidu de Gaetano signende una rete bella e finas difìtzile de ismentigare. Como torramus in A2, ma custa borta, cun meda umiltade, a carra a su cabu de subra.
Sa Torres ponet in sa bèrtula un’àteru puntigheddu pretziosu, gràtzias a Di Stefano
Lassamus istare sos bomber chi non cherent torrare a Tàtari cun su coro, sighimus tando a contivizare sos pitzinnos de intro de domo, ca pro como nos podent donare sa sarvesa, in su tempus benidore meda de prus. In campu amus òmines comente Mastinu, chi sos giòvanos los podet pesare cun sa balia prus bona. Chena ismentigare a Greco, unu mastru chi mudu mudu est acontzende su bàrriu de sa Brigada Tataresa, cun maestria manna. Como tocat de aguantare, ca sos primos rajos de lughe sunt intrende nòdidos a intro de sa domo.
Su C.O.S Sàrrabus onorat sa sèrie D sarda
Su Sàrrabus binchet 3-0 in domo de s’Ischia e si pasat a 29 puntos. Su Budoni puru abarrat a 29, ca perdet 1-0 in Trastevere. Su Monastir poddat su Monterotondo 2-0 e si bantat cun 31 puntos, a prima de sas sardas. S’Òlbia, chi solu pagas dies in antis pariat pronta a tancare s’assòtziu, mèritat unu bonu 0-0 contras a sa Palmese e podet torrare a bisare. Amargura in Tàtari pro su Latte Dolce, chi perdet in domo sua, contras a s’Atlètico Lodigiani e s’agroddat in sa mesania de sa classìfica.
Mario Bua Capitta, Amistade (cun su contivizu de s’Istituto Chircas)
