Il racconto del weekend calcistico isolano in limba sarda a cura degli amici di Amistade.
Su Casteddu non podet nudda contra a sos mertzenàrios
E puru finas issos, sos prus mannos de Itàlia, a sa fine ant coladu unu cuartu de ora malu, cando su coro de sos sardos est pigadu a pitzu e los at fatos trèmere. Tando s’isbatzinada de Adopo a pagos passos dae sa porta, agatat sa conca de Bisseck, a impedire su parègiu chi fiat pòdidu acudire sena furare nudda. Beru est chi su Casteddu non devet fàghere puntos contra a s’Internatzionale, ma su deretu de si la giogare devet abarrare, ca non semper amus a gherrare contra a gigantes comente su turcu Calhanoglu o su sardu Barella. In àteros tempos, aiamus prantu a trainu, oe namus a “mezus bidere”, isetende su mezus dae Maldini, cun Winks…
Sa Torres binchet ma non cumbinchet
Sa Brigada Tataresa giogat pagu bene ma binchet e collit tres puntos pesudos…Sas iscuadras si timent a pare e s’acùrtziant pagu a sas portas, cando sa sorte torrat a domo. Zini intrat a mala manera subra a sas ancas de su torresinu Boscaglia e sa Sambenedetese abarrat in deghe. Unu fallu in sa mesania intre a un’atzione de pagu contu. Sa Torres profetat de su vantàgiu donadu e a su minutu 63 istampat sa porta anzena, gràtzias a una rete galana de Carboni, bene cumbidadu dae Nunziatini. Bene torradu Michele. Sa Torres proat a tancare sa partida, ma sa Sambenedetese chircat puru de aparinare e sos tres frùscios finales sunt una liberatzione. Namus puru chi sa bìnchida lassat sos problemas suos in domo, ma aberit sa ventana a un’àera noa.
Sèrie D sarda: su ses de cabudanni si torrat in campu, luego su derby prus sentidu, Ossese contra a su Latte Dolce
Mario Bua Capitta, Amistade (cun su contivizu de s’Istituto Chircas)
