Il racconto del weekend calcistico isolano in limba sarda a cura degli amici di Amistade.
Su Casteddu còmpudat su cabu de subra de sa classìfica
Podet èssere chi sos sardos ant agatadu su bomber, o forsis duos, ca impare a su leone Mendy torrat a signare finas Maldini. Namus chi in unu campu allutu comente cussu de Bergamo non fiat fàtzile pro nudda, ma sos pitzinnos de Casteddu non timent a niunu, s’iscuadra est bilantziada bene in ogni contivizu, e tando, coladas bator partidas, est bona ispera de abbaidare sa classìfica dae sa punta cun noe puntos. Seguru tocat de ammentare chi semus solu a s’incomintzu e chi su campionadu est longu meda, non giuat a s’illudere, ma si podet bisare, pro ite nono?
Su Vanni Sanna est torradu fortesa tataresa
A pustis de sa partida pèrdida in Grosseto, sos sardos isetaiant de torrare a agatare sa balia pèrdida e sa Torres cussu at fatu. Sa partida no est nàschida bene meda. S’Ostiamare est tzucada a muida e Parigini no at faddidu su rigore a su minutu 16. Scotto non lis torrat su pràghere e si faddit su rigore donadu a sa Torres a su minutu 46. Paret torrada sa malasorte. Ma in su segundu tempus bi pensat Di Stefano, chi in duos minutos covecat sa gara e a pustis la ponet in seguresa. Semper isse, semper Di Stefano. A su minutu 89 s’Ostiamare si torrat a acurtziare cun Badje. Sos sardos, a sa fine, devent galu sufrire. Tres a duos pro sa brigada tataresa, abarrat su risultadu finale e Mastru Greco balanzat una cara lughente.
Sèrie D sarda: s’Ossese binchet in fora de domo sua
Glòria manna pro s’Ossese, chi binchet 1 a 0 in domo de su Vigor Campagnano. Su Monastir poddat 5-1 su Atletico Lodigiani. Su Budoni si lassat aparinare in domo sua dae s’Aranova. Àtera bìnchida pesuda pro sa C.OS. Sarrabus in domo de s’Anzio pro 0-1. Intre a sas sardas perdet solu su Late Durche, 2-3 in Tàtari contra a sa Paganese.
Mario Bua Capitta, Amistade (cun su contivizu de s’Istituto Chircas)
