Il racconto del weekend calcistico isolano in limba sarda: perdono Cagliari e Olbia, altra vittoria in trasferta per la Torres.
Casteddu rùet in su ludu ‘e sa laguna
Pèrdidu unu puntu pretziosu, torramus alenu a sos venetzianos, ùrtimos in sa classifica. Pàret guàsi chi sos sardos sunt falados in campu pensende a su puntigheddu, còntra sa filosofia de mastru Nicola, chi puru intro ‘e chida at nadu chi custa no fit s’urtima gara. Forsis, cheret narrere chi Casteddu si devet sarvare a s’ùrtimu minutu, comente donz’annu, si sa sorte cheret…pensende puru chi no pòtet essere semper Pasca. S’impressu est chi sa pèrdida giompet dae attesu. Beru chi niune potiat pensare sa pèrdida de segurèsa de
Sciuffet, chi obbligàt s’iscuadra a giogare cun su bàrdianu leàdu pro sa panchina. Tando Carnesecchi sa chida colada e Stankovic custa dominiga ant sarvadu sas partidas. Cagliari oe no at unu bardianu chi mudat su destinu de sa gara. Ma su problema oe no potet essere cussu de un’allenadore o de unu giogadore, su problema est àtteru. S’assotziu devet preguntare rispètu comente si toccàt, cando su sistema arbitrale donat piagheres a sos fortes, faeddamus como de Fiorentina e Atalanta. Cantos puntos amus pèrdidu pro gurpas de àtere?..Ite donàt sa mala giustìscia a s’ànimu de su giogadore? Semus un’assotziu lìberu o subaltèrnu?..
Olbia pèrdet s’ùrtima gara de su 2024
Gelbison- Olbia, 3-2. Leàda sa rete a 30 secundos dae incomìntzu, sos terranoesos tuccant in caminu de pigàda mala. A sa fine sos sardos, rùtos insègus de duas retes, àiant potidu puru apparinare sa gara còntra sos cilentanos. Ma sos valores in campu sunt cussos: Gelbison est segunda cun 32 puntos, Olbia s’appasigàt cun 16 puntos, in su logu battordighi. Cussos sunt sos valòres beros a sa fine. Tando toccàt de ammentàre chi sos bisos de mes’istadiale, abbarrànt bisos e pensare a si sarvare. Forsis a s’ùrtima gara.
Sa Torres agatàt sa bùssola in sa tempèsta
Sos sardos torrànt a sos tres puntos, còntra sos marchigianos de sa Vis Pesaro, brincados in classifica, a su cuartu logu. Cando Coppola at sinnadu a su minutu 67, pro sos tattharesos potiat esser’istadu s’incomintzu de sa fine. Ma gasì no est’istadu, ca sos sardos in su mamèntu de su perìgulu pius mannu ant bogàdu atza e coraggiu, de chie chèret bìnchere. In 15 minutos ant covecadu su resultadu, cun Fischnaller (duas retes) e Varela. A sa fine Vis Pesaro 1, Torres 3, cheret narrere chi sos sardos che colat sos marchigianos e giompet a
36 puntos, lassende Vis Pesaro cuintos a 35. Unu bellu modu pro passare bonas festas, cun s’speru de pigare in serie B in s’annu naschidortzu. Tot’umpare si potet.
Mario Bua Capitta, Amistade
