Il racconto del weekend calcistico isolano in limba sarda a cura degli amici di Amistade.
Su Casteddu ponet in sa bèrtula unu puntu pretziosu
Mancant Belotti, Mina, Zappa, Gaetano e cumpanzia… ma sa balentia bastat, paris cun s’atza e su coro e tando sa bona sorte cumprendet e acudit a tretu, custa borta. Totus ischiamus chi Ùdine fiat unu campu callente e de livellu artu, dae tempus meda. Pisacane però non pranghet, ischit chi Borrelli podet nàrrere sa sua. E Borrelli mantenet sa promissa. Tando torrat Luvumbo, e pro pagu no nos donat sa bìnchida intrea, s’isbatzinada sua faghet su bentu a sa linna de su palu. Pustis sa bona sorte e sa balia de su bardianu nostru, trazant sa barca a intro de su portu, sena ismentigare chi sos friulanos ant aparinadu, solu in fatu a una nostra faddina manna. Oe devimus nàrrere chi cun custu coràgiu, podimus abbaidare su tempus benidore, deretos in ogros.
Sa Torres perdet sa de tres, una in fatu a s’àtera
Bìnchida meritada pro sa Sambenettese in su Vanni Sanna, domo tataresa oramai fortesa ismentigada. Sos marchigianos, agiuados dae s’atza de sas bator bìnchidas, ant chircadu e agatadu sa rete dae luego, e agiuados dae sa bona sorte l’ant cunfiada cun su capitanu Eusepi, cando non fiat coladu nemmancu unu minutu dae s’incomintzu. Una falada de matza a conca pro sa Torres, chi atambàinat deretu. Emmo sos sardos ant chircadu de aparinare, finas a su minutu 42, cando Diagne at signadu su 2-0. Pustis non b’at àpidu prus nudda de fàghere. Mastru nou e iscuadra mudada meda, como sa Torres devet agatare coràgiu e identidade, cun s’agiudu de s’assòtziu e de totu sa zente chi l‘amat. Frùscios emmo, sena ismentigare chi in caminu s’acontzat su bàrriu. Beru, sos problemas de cumprire sunt meda a beru, ma b’at galu tempus meda.
Serie D sarda, su Sassari Latte Dolce poddat s’Òlbia in Terranoa: 1-6
Su Sassari Calcio Latte Dolce binchet 6-1 contras a s’Òlbia, chi cumintzat bene signende a primu cun Ragatzu. Binchet su Budoni puru, in domo de s’Anzio 5-0. Su Monastir perdet 2-3 in domo sua contras a sa C.O.S. Sarrabus. A die de oe, solu su Late Durche, tertza cun 13 puntos, respirat s’àera frisca de su cabu de subra de sa classìfica.
Mario Bua Capitta, Amistade
