Il racconto del weekend calcistico isolano in limba sarda a cura degli amici di Amistade.
Su Casteddu tucat male e su Nàpoli non perdonat
Su Casteddu giogat ma non punghet, Caprile paret orioladu dae su mercadu e dae sa natzionale, e si lassat trampare a incomintzu che pitzinnu puzone, abarrat firmu cando sa bròcia colat in s’àrea sua. Pro unu comente a McTominay, est istadu fàtzile a beru. Fiant colados duos minutos ebbia dae su frùsciu de incomintzu, e nde mancaiant 90 pro una remontada possìbile. Seguru chi s’aversària si naraiat Nàpoli, segunda in sa classìfica de sa sèrie A, cun s’iscudeto italianu bene atacadu in petorras, ma su Casteddu non est resessidu a si liberare dae sa gàbbia fraigada dae Conte e tando 90 minutos non sunt bastados. Beru est chi sos napoletanos ant pensadu prus a distrùere su giogu de sos sardos, difendende s’unu a zero fintzas a sa fine, ma como su tempus de iscusare s’iscuadra est passadu. Finidu. Sa Cremonese nch’est colada binchidora, in su campu de unu Parma modde che gioddu. E como sa sèrie B est solu a tres puntos. Non b’at prus tempus pro isballare o pranghere.
Sa Torres binchet un’àteru puntu pretziosu in su istàdiu Curi de Perùgia
Gara callente in domo perugina, chie perdet nche ruet in sèrie D. Tando isponent 1-1. Ambos abarrant in giogu pro sa sarvesa dereta, ambos si la podent galu gherrare. In domo tataresa abarrat s’amargura pro unu finale triller: a su minutu 83, sa difesa de domo firmat in àrea Jocelito, chi a pustis signat in sa porta sua. S’àrbitru annullat pro fuorigioco. Cando su VAR li narat chi non podiat èssere istadu fuorigioco, tando s’ammentat de una punitzione sena frusciada non s’ischit dae cando. Tando, nois sighimus a preguntare àrbitros internatzionales pro sa sèrie C puru.
Die lughente pro su Budoni in sa sèrie D sarda
Su Budoni torrat a bìnchere in in domo sua, 3-1 contras a su Real Monterotondo. Puntigheddu pro s’ò lbia chi parègiat 0-0 in su Bruno Nespoli, contras a su Cassino e àteru puntu de oro finas pro sa C.O.S. Sarrabus 2-2 in domo de su Montespaccato. Nudda ite a fàghere pro su Monastir in domo de sa capolista Scafatese, chi binchet 4-2.
Mario Bua Capitta, Amistade (cun su contivizu de s’Istituto Chircas)
