Olbia cantàt sa disisperada, cando totu sos sinnos narant chi tocat de jumpare su mare mannu e torrare a cussu minore, a cussu connottu dae inue semus tuccados una die lughente, pustis de otto annos colados in altu mare. Sos sinnos sunt oe pius nòdidos de deris, faeddant de una navighedda nuragica bendida a sos mercantes isvitzeros, de unu capitanu c’at devidu lassare sa nave cando su mare fit galu in tempesta, de un’assoztiu inue no si faeddat pius su sardu né su gadduresu. Rimini 5, Olbia 0…potiat essere istadu 1-0, semper tres puntos sunt, ma su valore de s’animu no est su matessi. 5-0 narat chi sunt bennidos mancu su coragiu e forsis sa dignidade puru, ma pius de totu s’amore pro unu logu, unu logu chi meda at donadu a sos sardos e a su mundu, unu logu chi meritat àteru donu. Inoghe si narat puru chi s’isperu no morit mai, tando tenimus su dovere de lu contivitzare fintzas a sa fine, pro sos omines e sas feminas chi custu logu lu amant. Si narat puru chi su connottu tenet sa memoria de su remediu pro donzi male e tando torramus a su connottu de sa serie D, in sa chirca de s’atza e de s’onore pro podere navigare torra in altu mare.
Sas faddinas gadduresas potent como ajuare, in àtera manera sa Brigadas tattharesa e de Casteddu. Sa Torres perdet in sae Gubbio 1-0, iscuadra de gabbale cuinta in classifica, tando perdere si potet, ca cust’est su giogu de sa fubal. No giuat però de immentigare chi su caminu pro giompere a sas serie B est galu abbertu e tocat de mantennere bios ischire e balia pro bi proare. Fintzas a sa fine.
Casteddu faeddat àtera limba, chi tantu divessa no est: si narat salvèsa, ma est cosa chi oe balet pius de una promozione e pro premiare cust’idea, sa gara cun su Verona si potiat solu binchere, Sos sardos ant lassadu duos puntos in caminu chi a sa fine potent torrare pesudos meda. Como tocat de de los furriare a domo custos duos puntos, ma si potet cun Atalanta, Inter o Juventus? S’istoria de su mitu contat de Davide pastore minore chi binchet còntra Golia, Tzigante malu cantu mannu. Tando devimus ammentare chi sa fubal no est solu un’isport, ma nova mitologia puru.
Mario Bua Capitta, Amistade
