Casteddu agatat s’atza pro remediare a sas faddinas puru, abbarrat in perigulu, ma como s’aria est mudada, acaddu a 26 puntos, s’istejat de tres dae su terzultimu logu in classifica, lassende bona parte de sos perigulantes in-segus. Como su perigulu pius mannu potet naschere dae s’illusione chi sa pratica tiat poder’essere achivida. Ma Ranieri est babu sabiu, e isse bidet bene sue faghere, pro chi su bonu caminu fatu dae s’assotziu in su mercadu de bennartzu no siet in-debadas.
Olbia torrat a perdere, 1-0 in sue Ancona, pagu mudat in altesa e s’aria est semper cussa, semper de pius accurtzu a sa serie D, domo de sos diletantes…si oe potimus narrere chi bene at fatu Casteddu in su mercadu de Bennartzu, ateretantu no potimus narrere de s’assotziu terranoesu. Sos battor giogadores leados no ant donadu s’atza noa preguntada, comente Mina e Gaetano ant fatu in Casteddu e in campu a gherrare abbarrant in pagos, comemte su sentidu narat.
Sa Torres sighit a binchere e giompet a sa sesta gara, una fatu a s’atera, isetende como sa ruta de su Cesena. Bi pensat Ruocco a mudare sa gara in favore, cando pariat torrende in mala sorte. A su minutu 82 Petermann aiat apparinadu su vantagiu tattaresu e sa Torres at agatadu in su mamentu pius criticu s’orgogliu e sa balia connotta.
Mario Bua Capitta, Amistade
