Casteddu b’est. S’iscuadra at mudadu armagùra e bèttia carrada dae sa fùra retzida, in orgògliu e bàlia, comente isperàdu tota chida. Metzus no si potiat ammentare su nomene de Gigi Riva, ca su 3-3 bàlet meda pius de unu puntu.
Tando su campu at nàdu chi como sos sardos no timènt pius a niune, mancàri sient issos re o imperadòres. Como Casteddu giumpat su caminu de s’identidade, de ànimu e de giogu, cussu incomintzàdu dae Ranieri e sighidu cun sabièsa e umilèsa dae mastru Nicola. Totu ischimus chi su caminu est galu longu e tando no giuàt a si frimmare: sa defesa cheret galu sestada, amus leadu 5 retes in sas urtimas duas partidas e no potet essere semper e solu gurpa de su portiere. Seguru chi su Cagliari at devidu gherrare còntra attacos balèntes, armados cun campiones famàdos, comente Leao, ma sos sardos ant babbos mannos, chi dae attesu nos abbaidant, tando sa rete de Zappa, cussa chi at apparinadu sa gara a su minutu 89, nos at ammentadu carchiunu e carchicosa.
Olbia bìnchet fora ‘e domo còntra Savoia, 1-3, no paret beru. Cando s’assotziu at confessadu sa crisi pius niedda, e fatu a mastru Amelia, Gatti puru s’est arresu, tando sos bàrdianos de su faru, ant torradu a domo tres puntos de oro, paris cun su coràgiu e sa dignidade. Costanzo e Furtados cun duas retes, sunt nòvos eròes, galu pagu nòtos, cun s’isperu chi luego potant rupire sa janna de su coro terranoesu. E Gatti como ite faghet?..S’assotziu devet agatàre luego unu cabu, ca sa càminera noa bisontzat de una bona guida.
Sa Torres narat chi su campionadu de serie C est una semida pedrosa e su Pescara disponet forsis de una marcia in pius. Custu no cheret narrere chi sa brigada tattharesa si devet arrendere, Tatthari no potet.isponnere sa lòtta. Leare una rete a su minutu 90, una rete chi apparinat ma balet duos puntos, donat unu sentidu ranchidu a chie amat s’assotziu, pensende chi sa Torres at giogadu sos urtimos baranta minutos cun s’omine in pius. Ma in su mundu dre sa fùbbal totu potet capitare e pro cussu est su giogu pius bellu de su mundu. Imparare però si potet e si devet pro sighire a abbarrare in su cabu e subra, sighie a resistìre, ca Pescara puru, una die o s’àtera at a dever’rùere.
Mario Bua Capitta, Amistade
