Fine chida sèna paghe pro sas iscuadras sardas impignadas in su mundu de sa fubbal de professiòne.
Sa serie A at connottu un’àtera die iscura pro Casteddu, chi est resèssida a donare aria frisca a una Lazio cun su mare in tempesta. Comente semper sos sardos lassant sa briglia de su giogu a sa còntra pro tota sa prima parte de sa gara, cun faddinas nadas dae un’oriolu mannu. Como non mancant sinnos de isperu: amus giogadores nosos de gabbale comente Mina e Gaetano, luego ant a torrare àteros dae sa maladia, s’iscuadra b’est su mastru lu connoschimus totu, ma su problema mannu abbarrat mentale e no est minore, a incomintzare dae Ranieri matessi. S’isperu e su coro no potent pius isetare, s’scuadra a bisontzu mannu de curagiu e dignidade, ca dae sa chijìna si potet torrare a naschere.
Sa Torres torrat a perdere in domo, còntra sos pitzinnos de sa Juventus U23, 3-1 sèna remediu. Su Cesena, vintzente a Rimini 2-0, fùit a +12 e bocchit donzi isperu de promotzione derèta. Tando pro sa brigada tattharesa puru naschet unu problema mentale: s’oriolu de chie no resessit piu a binchere. Su curagiu e sa balia connotta si faghente timore, tremore cando si giogat sa bòcia. Bene narat matru Greco: no fimus campiones prima, ma no potimus essere bidones como. Ma tando ite semus? Si preguntant totu sos amigos de s’iscuadra, ispantu mannu de su girone. Forsis su pesu tratzadu dae incomintzu no si potet pius parare, forsis tocat de chircare de accontzare barriu, ca su caminu no potet essere pius cussu isperadu indebàdas. Su segundu logu in classifica e su play-off sunt galu possibile de achivire si s’agatat su perdidu curagiu e sa gana antiga e noa de gherrare.
Olbia ischiat bene chi su campu de Ancona no est modde pro nudda e su mastru nou Gaburro at proadu a donare atza a cussa chi oe tòrrat a terza iscuadra sarda, cussa chi pianghet sa matessi maladia de sas àteras duas, Torres e Casteddu, sas ancas no faeddant pius cun sa conca e cun su coro. Est una maladia. Bi fit cherfidu Freud,ma cussu no si potet faghere e tando? Donzunu si devet curare solu cun s’ajudu de totu però, pubblicu amigu e assotziu intreu. Niune devet faghere a mancu de sa parte sua, prima chi su tempus no lasset sèna lagrimas pro pianghere…lagrimas isportivas, siet custu nòdidu e presente, ca s’ìsport no devet fàghere a religione.
Mario Bua Capitta, Amistade
