Tres puntos pèrdidos pro Casteddu,in sa die de sas faddinas a Udine. Su meritu mannu de s’Udinese no bènit dae unu giogu superiore, ma dae sa mancàntzia de faddinas in campu. Cust’est sa serie A. Faddìdu at Makoumbou, e no est sa prima olta, lassende sos cumpantzos in deghe pro un’ora e pius. Mastru Nicola puru at fatu sa parte sua. Si isse aiat apidu cumpresu, sa tribulia de su frantzesu còntra sa balia de Payero, malu a frimmare si no cun sas malas, cussa matessi chi l’at procuràdu sa prima ammonizione pustis de chimbe minutos. Namus puru chi sa die in-fatu est semper fatzile a narrere it’est meda ‘onu o pagu. Sas faddinas però deven’essere de impitu mannu pro imparare e donare continuidàde, cussa netzessària pro onorare sa serie A, gasì comente si devet e comente Sardigna meritat.
Olbia incomintzat a accontzare barriu e ponet in bertula unu puntu de oro, balantzadu in domo de Totti, còntra Trastevere Calcio. Sos terranoesos gratzias a custu puntigheddu, che colant s’urtimu logu in classifica, lassende Sarrabus Ogliastra a sa sola, e abbertzende s’aidu a un’isperiu nou…ma est solu illusione, un’incantu ‘e pagu contu, ca si da poi pèrdet in domo 1-3, còntra sa Flegrea, tando fintzas sa Curva Mare li ‘ogat de cabu…
Sa Torres sighit, chena timore de s’aria ‘e montagna, a jumpare sa semida de su cabu ‘e subra, gratzias a sas retes de su “bomber”, Fischnaller e de unu giogadore nou chi faghet meda pensare a sa serie B: si narat Guiebre e at sinnadu duas retes chi solu unu mastru mannu potet faghere. Sa defesa paret galu de sestare metzus, ma cun un attacu comente cussu tatttaresu si potet leare calchi rete in pius, ca cun su carattere e un’iscuadra balente donzi remuntada est possibile. E Ternana cun Pescara, como faghent pagu timore.
Mario Bua Capitta, Amistade
