Sa Torres pèrdet duos puntos, in domo còntra sa Ternana, iscuadra fraigada e cunfessàda, pro che pigare derètta in B, chena bisonzu de playoff. Eppùru cando sos omines de Greco, gratzias a Zambataro, a su minutu 75 ant potidu abbèrrere sa janna de sa porta umbra, tando sos sardos ant comintzadu a bi crere, ma forsis s’altària manna at donadu imbaddininzu, e Dametto, chena lu chèrrere, at fatu a sos istrantzos su donu de Nadale prima ‘e s’ora, furriende in sa porta sua unu cross disisperàdu de Corradini. Fit tando su minutu 83…Beru, bonu e giustu de abbarrare a pè in terra, ma semper a conca alta e carena deretta, ca Tatthari meritat sa serie B, dae meda ma oe de pius, gratzias a unu progetu bàlente.
Olbia torrat a perdere malamènte e abbarrat gasì sola, sola in sa coa de sa classifica. Perdere una gara in s’isport no est cosa mala, devimus pero mantennere curaggiu e dignitàde. Sos bardianos de su faru, potent torrare mannos, comente in s’antigòriu, ma in tempos aacurtzu a sa die de oe, no. Curaggiu, tando est tempus de la finire, de faeddare de promotzione, no cust’annu, como toccat de cunfessàre sa faddina e torrare a su connottu, gherrare pro mantennere sa categoria, sa serie D.
Casteddu domat su trau piemontesu 3-2, chena immentigare chi s’annu coladu, nos ant poddadu issos 2-1, semper in su Domus. It’est solu sa sorte o àtere puru?.. Namus chi s’iscuadra est ponzende a frutu s’annu de esperientzia in pius, chi pro sa serie A no est paga cosa, ma pius de onz’àtera cosa mi paret de poder’narrere, chi Casteddu at agatàdu su curaggiu, cussu chircadu dae tempus meda, e impitadu pro bìnchere sas garas, ‘ischende chi si potent puru perdere. Sa sorte donàt tando gratzias a duos mastros mannos, comente Ranieri e Nicola chi est cumpletende su tribagliu de su primu, a moda sua,investende isse puru in identidade, chi no est solu cussa de giogu. Su Torino gighet s’animu de una tzittade manna o meidade de issa, Casteddu est sa bandela de unu populu e custu at forsis detzisu sa bìnchida…
Mario Bua Capitta, Amistade
