Tres puntos pesùdos pro Casteddu. In numene de Capone, s’iscuadra at mudadu s’armagura in orgògliu e cuntentesa de su coro. A isse fit piachidu meda. Ma su coro a sa sola no potet bìnchere, tando, comente pregadu dae mastru Nicola, Casteddu at postu in campu tramas de giogu e balia manna. Zortea, Marin e Piccoli, omines bennidos dae dae attesu, ma amoràdos de Sardigna comente pagos, c’an bogadu sa marrania de sos palos de linna a foras. E sa terra ischimus cantu potet torrare. Como sos sardos lassant s’urtimu logu a sos lombardos de su Monza, e tuccant in sa chirca de una continuidàde, impitàda pro onorare sa serie A, gasì comente Capone e cumpantzos ant fatu in àteros tempos.
Olbia no est Ibiza…Bene at fatu s’assotziu a confessare sa crisi pius manna de sos urtimos degh’annos. Sa responsabilidàde est toccada a mastru Amelia, a isse chi forsis de gurpas nd’at pius pagu de totu. Bonu abbarrat de ponnere umpare totu sos bìcculos, ruttos male a terra, paris cun s’utima podda, remediada in sa domo laziale de Anzio, chi che tratzat Terranoa a s’ùrtimu logu de sa classifica de sa serie D . Ammentamus puru chi solu duos annos sun colados dae cando Olbia fit sa segunda iscuadra des’isola. In sardigna, ischimus bene chi sos tempos malos preguntant su connottu, no b’at àteru remediu. Tando dae sa perdida potet naschere s’energia noa, su briu pro torrare mannos che una ‘ia.
Sa Torres narat chi su campionadu coladu, no fit unu fogu ‘e mudèju. Gratzias a sas retes de su “bomber”, Fischnaller e de su tattharesu nou, Mercadante, ant violadu su campu ‘e Gubbio, in terra umbra, abbarrende gasì in su cabu ‘e subra de sa classifica, paris cun Ternana e Pescara. Sa brigada tattharesa como no est pius una novidàde in sa ‘idda de sa serie C e sa còntra isetàt cun s’arcibusu puntadu e balia manna. “Never mind” narant tando su capitanu Gigi Scotto, cun cumpantzos nosos’ comente Mercadante e Nanni puru. Tatthari potet gherrare e isperare in un’eranu sportivu nou. Nudda namus…
Mario Bua Capitta, Amistade
