Ierru longu pro s’assotziu terranoesu, ch’imbiat a domo sua mastru Amelia e sighit a narrere chi s’iscuadra chere pigare in C, bruschende poddas una fatu a s’àtera. Sa Torres imbrunciàt in domo sua, solu Casteddu mantenet altu s’onore isolanu, donende dispiaghere, a unu de sos meres mannos de su campionadu, sa Juventus. Nicola at carradu caràttere a s’icuadra.
Tando sa Juve si devet cagliare a sa muda e accontentare de su puntigheddu balantzadu, ca si un’àtera linna ‘e palu, no si fit posta torra in mesu, custa olta a su tiru seguru de Obert, Casteddu aiat potidu gighere in Sardigna tres puntos, pagu isperados. Nois potimus faeddare tota chida de sas faddinas de s’arbitro, ma cussu no mudat su destinu. Sos fatos narant chi sos torinesos abbarrant in su cabu ‘e subra e piu de totu, ammentant chi Casteddu non giogat pius pro remediare una perdida durche, ma pro chircare bìnchida, semper e in donzi logu.
Sa gara de sa brigada tattaresa, narat àteras cosas, oe. Sa Torres perdet ca s’Arezzo est forte e cun sos fortes cheret abbarrare. Ma imbruciàt male ca galu mancat de sa condischiòne chi donat sa continuidàde e pro cussu devet tribagliare meda, mastru Greco. No est pagu ma si potet faghere. .
Si sa torres perdet 2-0 in domo sua, meda est devidu a sas retes, ambas sinnadas dae Ogunseye, chi in Terranoa est galu ammentadu. Olbia perdet sos omines pius balentes e oe torra in su Nespoli, 1-0 còntra Real Monterotondo, chi no est Real Madrid. S’impressione est semper cussa chi sos piseddos nostros, in campu no donant s’anima. Su coro e s’ischire abbarrat in àteros campos. Paret chi s’Olbia mancat de identidade de giogu, ma no solu. Chie amat cust’assotziu sighit a isperare, ca Olbia 1905 no devet mòrrere.
Mario Bua Capitta, Amistade
