Tatthari e Casteddu agatant sa perdida balia, Olbia devet galu chircare
Cando Zito Luvumbo, mudu mudu, at unfiàdu sa rete napoletana, fit solu su minutu 96. Sa partida pariat perdida sena remediu perùnu e cun issa sa serie A puru:1-1.. Tando Unu est solu unu numeru, minore ma su pius mannu puru. Unu at apparinaddu sos contos, moderadu sa malasorte contraria, unu donat animu nou, in tempos de bisontzu mannu, unu abberit sa janna a s’isperu, cando in su tempus bennidore, s’accurtziant sas garas còntra Empoli e Salernitana, chi in pagas dies si giogant ses puntos pesudos, chi faeddant de serie A. Sos sinnos sunt meda in sa dominga de su votu isolanu, Casteddu at donadu unu cabu a chie naraiat chi s’iscuàdra no aiat giogu né identidàde, sos campione de Italia ant bidu cantu, ite cheret narrere de gherrare sa partida còntra sos sardos a die oe. Su numeru 77, Luvumbo attacat che-i sos mannos, Scuffet est su bardianu seguru de una olta, kvara no bidet sa bòcia e su mastru sou che lo bogat a foras, s’omine chi l’at frimmadu si narat Nandez chi est torradu su gherradore connottu, classe e linna, che-i sos mannos. Como sa salvèsa la potimus perdere solu nois…
Sa Torres poddàt su Pontedera de mastru Canzi, in domo sua…Scotto, su capitanu balente guidat su carru vintzente, fintzas cun pagu barriu, ca meda titolares no bi fint. Sa brigada Tattharesa profitat de sa classe de Mastinu, chi donat una bòcia galana in sa mesania de s’area, inue Scotto no si faghet pregare pro insaccare su vantagiu isperadu, cun sa conca. Est su minutu 52. Deghe minutos infatu bi pensat Zambataro a cuntzare sos contos, cun assist donadu dae su capitanu. Ma est solu un’illusione. In zona Cesarini s’accurtziant sos toscanos, cun sa rete de Provenzano. Tando sos urtimos chimbe minutos, iscobiant tota s’atza chi connoschimus cando tocat de resistere. E sos sardos ant nadu chi su connottu est torradu, sa Torres abbarrat segunda e mantennet sa distanzia preguntada dae sa Carrarese, semper terza.
Olbia abbarrat in sa timòria de su mare in tempesta. Amus totu pensadu chi su ‘entu fit torrende a furriare ‘ene, cando Nanni a su minutu 83 at apparinadu sa rete de un’ex chi nos mancat meda, King Udoh su lione, Ma su matessi ‘entu, tot’in unu s’est torradu a frimmare, cando sa còntra at agatadu su Coupe de thèatre e s’arbitro b’est rutu male, trampadu che anzoneddu minore. Custu in serie C, né in perun’àteru logu, no devet pius torrare a capitare. Bi cheret su Var pro sos poveros puru. Tando Olbia perdet unu puntu meritadu, un’omine c’aiat giustamente protestadu, Biancu bogadu a foras, ma su presidente ch’est in lega, nudda potet faghere? Como no giuat a faghere sas vitimas, devimus torrare sa ‘ettia in Balia.
Mario Bua Capitta, Amistade
