Olbia fit Olbia in antigòria… E oe?..Oe su mundu est mudadu. Rùere servit pro si torrare a pesare, passos in-segus potent ajuare a torrare innantis, a bortas pius de prima. Tando toccat semper de impitare sa sabiesa chi solu sa faddina nos donat.
E su remediu s’agat meda in su connottu, su siddadu nostru. Gasì no paret siet capitende in Terranoa. Sa podda manna (3-0), bruscada in domo, còntra s’Ilvamaddalena potet essere sa prima gara chi pagu narat o puru s’avvìsu pro accontzare barriu prima chi siet torra tropu tardu. Nois it’amus bidu? Lassamus a un’ala su resultadu, Olbia at incomintzadu a tribagliare pius tardu e diftatis est ruta in su segundu tempus. Su chi oriolat de pius est chi s’iscuadra no at identidade, né in su giogu e pius pagu puru in s’apartenèntzia e no solu intro s’assotziu. Giogadores galu pitzinnos putzones, accudint dae àteras iscuadras, inue sunt naschidos e paschidos e benint a Olbia a istracubaràtu, solu pro faghere unu pagu ‘e “gavetta”. No totu s’intendent in domo issoro cando rupint sa janna de su Bruno Nespoli. Sa matessi faddina at fatu s’assotziu in custos ultimos annos, paghende meda caru puru. Ite cherimus faghere pro torrare a nos faghere timire dae mes’Italia e amare dae sos olbiesos e sos sardos totus?…
Brecht nedit: “biadu su popolu chi no at bisontzu de eroes”. Ma Casteddu paret chirchende eroes chena pasu, dae su tempus de su miticu Giggi e prima puru. S’urtimu est istadu Ranieri, chi forsis at lassadu Cagliari e ispostu sa carriera, ca cust’impignu incomintzaiat a li pesare…De Ranieri segnore de sa fùbbal no solu sarda e italiana, forsis aimus devidu contivitzare sas faddinas puru de s’omine in chistione (chena immentigare chi in àtero tempos si lassedit furare Zola…). Abbaidamus un’esempiu a die de oe: Jankto pro Ranieri aiat devidu rinforzare sa mesania sarda. Como, colada sa paristoria de s’istadiale donada a giornales e social, cun Nicola, candidadu isse puru a biadu, nos preguntamus si est bene fatu. Intantu sunt tuccados Nandez e Dossena, omines chi ant ajuadu su meraculu serie A. Nicola nos potet ajuare e meda puru, solu si cunsitzat e cuncordat unu programma cun s’assotziu, pensadu pro resistere su tempus. Atalanta docet. Como isetamus su Napoli, no est un’esame ma potet donare sinnos de importu mannu.
Torres torrat in caminu. Sos tattharesos, perdida sa gara manna cun su Benevento, no at donadu logu a su dispiaghere né a disisperu, ma sighit a chircare de binchere e cunbinchere in domo còntra Vis Pesaro 3-0 e in-foras a Carrara 2-2, cun sa matessi balia de s’annu coladu. Mudende pagu in omines e sighende a investire in identidade, chena si perdere in sa chirca de numenes lughentes e bisos de gloria. Sa semida abbarrat gasì galu abberta e potet giompere a sa serie B puru. No est fatzile seguru, ma sa bènnida de Nanni dae Olbia e sa cunferma de mastru Greco, cheret narrere chi su desitzu de gherrare est gal’incue.
Mario Bua Capitta, Amistade
