Olbia zero tiros in sa porta antzena, e setima perdida una fatu a s’àtera. Casteddu sighit a rùere attesu dae domo, solu sa Torres rìet cuntenta in custa Dominiga de mes’Ennartzu.
Sa Brigada Tattharesa istudat s’isperu de s’iscuadra terranoesa chi como abbaidat in cara sa crisi manna e pensat a comente mudare caminu in tempus bennidore. Sa Torres, abbaidat dae basciu su ‘olu de su Cesena, ma su bisu est galu nodidu, faghet una bona partida, agatat sa rete chena perdere tempus meda…e pustis avelguat sa paga ira de sos gadduresos, abarrados oe cun pagu coro in campu.
Casteddu guidàt sa gara pro un’ora gratzias a sa rete umfiada dae Sulemana, chi accoglit una bòcia furriada dae sa defesa ‘e domo subra un’isbatzinada de Petagna e no perdonat a Turati, bardianu ‘e domo. Sa gara si ponet in pigada in su segundu tempus pro sos sardos, cando su Frosinone incomintzat a attacare cun balia manna, fatende tremare sa defesa istranza chi si sarvat gratzias a sas paradas de unu portiere de gabbale: Sciuffet. Ma a bortas sos meraculos no abbastant e Schuffet puru si devet arrendere còntra Mazzitelli prima e Soulè in-fatu, chi sinnat cund’una punizione galana abberu a su minutu 75. Tando s’ischidat su Cagliari, ma Frosinone puru at unu bardianu dignu, si narat Turati e resessit a sarvare porta e resultadu, prima subra Dossena e pustis giompet a s’isconchinada de Pavoletti, chi donat su bisu de sa rete. Fit su minutu 94. A s’urtimu momentu bi pensat Kaio Jorge a cuntzare sos contos: Frosinone 3, Cagliari 1. Sa binchida fora e domo paret impedida dae calchi marrania e no solu. Sos sardos como si devent curare sas feridas, imparare dae sa perdida totu su chi si potet., CA Chenapura accudit a Casteddu su Torino.
Mario Bua Capitta, Amistade
