Il racconto del weekend calcistico isolano in limba sarda a cura degli amici di Amistade.
Su Casteddu fiat Casteddu antigamente
Pigados a 30 puntos, Pisacane puru at pensadu chi sa sarvesa fiat cumprida. Forsis isse no l’at chèrfidu pensare ma custu est su chi su caminu narat. In Pisa tocaiat de bìnchere, ma s’iscuadra at giogadu pro su parègiu e in ùndighi contras a deghe at pèrdidu sa partida. E su Pisa chi giai bidet su progetu bortare in sèrie B, at aprofitadu de su coro minore de sos sardos. Su Casteddu at leadu tres retes, ma sena sos miràculos de Sant’Elia, podiant èssere istadas bator o chimbe puru. Abarrant bonos sinnos puru, Mina est campione beru e cando at lassadu su campu sa defesa at patidu e meda puru. Kilicsoy sena retzire perunu cumbidu at gherradu che unu leone e Gaetano est torradu pro mustrare chi sa calidade no est abba. Dae in cue podimus tucare, creo, pro giogare unu finale de campionadu, sena s’oriolu de una sarvesa de bìnchere a s’ùrtima partida.
Sa Torres torrat a leare unu puntu de oro
Sos tataresos, sighint a gherrare pro sarvare s’iscuadra dae sos play-out. Seguru chi contras a su Ravenna s’idea fiat cussa de bìnchere. Ma su Ravenna est Ravenna e cando sa partida s’aparinat a su 90+3, tocat de nàrrere gràtzias a sa sorte puru. Como tocat de nàrrere chi sa Torres at giogadu menzus de su Ravenna e mastru Greco in amargura pensat chi custa fiat partida de bìnchere. Est a beru, ma contras a su Ravenna si podiat pèrdere puru. Si su mastru resesset a sestare una difesa, chi abarrat forte ma onzi tantu si nche dormit, tando si podet bisare unu tempus benidore prus lughente.
Sèrie D sarda: s’Òlbia binchet in Ischia
In su campu de s’Ischia sos terranoesos binchent 3-1, cun Furtado chi signat tres retes. Amargura pro su Budoni, chi perdet in domo sua e como devet abbaidare a su cabu de giosso. Su Latte Dolce perdet 2-0 in Tàtari contras a sos primos de sa classe de sa Scafatese. Bene meda su Sarrabus chi, in domo sua, binchet 3-0 contras a s’Albalonga. Su Monastir aparinat in fora de domo cun su Flaminia e abarrat sa prima de sas sardas, cuarta in classìfica.
Mario Bua Capitta, Amistade (cun su contivizu de s’Istituto Chircas)
