Il racconto del weekend calcistico isolano in limba sarda a cura degli amici di Amistade.
Su Casteddu timet de bolare. Pèrdidos duos puntos
Pisacane at dèvidu cumpudare s’iscuadra de sos pitzinnos pro resessere a pònnere ùndighi giogadores in campu, e tando totus, prima de cumintzare sa partida, aiamus àpidu firmadu pro unu parègiu e in presse puru. Ma s’iscuadra como at un’identidade. Como ischimus, gioghet chie si siat, chi sa partida est semper aberta a onzi resurtadu. Ma sa classe de onniunu podet semper nàrrere carchi cosa pro su resurtadu finale. Custu narat Folorunsho, torradu in campu a pustis de duos meses colados in maladia. Intradu in su segundu tempus, a sa prima falada a s’ala destra at liberadu un’isbatzinada, tantu forte cantu pretzisa, chi at lassadu sena paràulas a Corvi e a totu sa zente in tribuna. Bene torradu Michael, sa rete prus bella de s’annu est sa sua. Forsis. Dae su minutu 62 su Casteddu at incomintzadu a abbaidare a segus, presos dae sa timòria de leare una retighedda, chi a sa fine est acudida. Duas bròcias pèrdidas intro de s’àrea prena de giogadores sardos, e s’ex de sa die, Oristanio s’est agatadu a sa sola in cara a Caprile. Tando non podiat isballare. Su Casteddu at mezoradu meda cun mastru Pisacane, e como devet imparare a giogare sena s’oriolu de nche rùere in s’inferru de sa sèrie B.
Sa Torres torrat a pèrdere, duos a zero in Forlì
Pariat cosa de s’antigòria ma in su fùbalu si podet bìnchere e pèrdere puru. A su minutu 24 Zaccagno, oe pagu santu, at donadu sa bròcia pro signare a Franzolini, chi no at perdonadu sa faddina. Ma in s’isport non giuat a agatare iscusas, Su Forli at signadu sa segunda rete e pustis, at sighidu a atacare sena pasu chirchende sa tertza. Sos tataresos, puru b’ant proadu, ma oe sa partida fiat sinnada. Como sa Torres abarrat a 25 puntos e pro sa sarvesa dereta non podet prus seberare: onzi gara dae como a dae in antis, devet èssere giogada che s’ùrtima finale de su mundu.
Sèrie D sarda: torrat su beranu pro O’lbia e Tàtari
Amargura pro su Budoni, in su derby de Gaddura. Signat Ragatzu e sa partida isponet 1-0. Pro su Budoni cheret nàrrere adiosu a su bisu de sa promotzione, pro sos terranoesos s’incomintzu de un’annada noa, bona pro sa sarvesa dereta e puru pro sa sèmena. Su Tàtari Latte Dolce binchet 2-0 in domo de su Trastevere, segunda in classifica. Bene finas pro su Sarrabus 0-0 in domo de sa Palmese. Male pro su Monastir, prima de sas sardas, chi perdet in domo sua contras a s’Ischia Calcio. Sena piedade sa Scafatese sighit a bìnchere, segura in su caminu pro sa sèrie C.
Mario Bua Capitta, Amistade (cun su contivizu de s’Istituto Chircas)
