Il racconto del weekend calcistico isolano in limba sarda a cura degli amici di Amistade.
Mare malu in su portu de Gènova: Gènoa – Casteddu 3-1
Su campu narat chi su Gènoa e su Casteddu sunt a si la dare, su livellu tècnicu est su matessi, metzanu, ma sos genovesos sunt azigu prus famidos e sa difesa sarda andat galu acontzada. Si podet fàghere, ma tocat de bi pensare in presse, ca sa gherra pro sa sarvesa torrat semper prus rànchida pro chie sighit a rùere in faddinas elementares. E santu Elia non bastat onzi die. Tzertu, si sa linna de sa traversa no aiat àpidu nadu unu santu chi nono a s’isbatzinada a bolu de Palestra e si Luvumbo no aiat àpidu su timore de signare, tando oe aiamus pòdidu faeddare de un’àtera partida. Ma in sèrie A chie isbàlliat pagat e nemos ti torrat su praghere retzidu. B’at de nàrrere chi s’iscuadra sarda est càrriga de giovanesa e at meda de ite imparare, ma su tempus est pagu e como benit a domo sa Juventus, chi de donos nd’est fatende pagos.
Sa Torres carrat a domo unu puntu de oro
Unu puntu in domo podet èssere gasi pretziosu? Pro ite tando? Sa Torres aparinat contras a su Campobasso, chi sa chida colada, at poddadu su Ravenna, lassat s’ùrtimu logu de sa classìfica e si nche istrèsiat dae s’iscuru de sa sèrie D. E no est pagu. Bator puntos in sas ùrtimas duas partidas faeddant de unu mezoru nòdidu dae cando mastru Greco curat su malàidu. Sena ismentigare chi in s’atacu finale, chi at batidu su rigore, signadu cun maestria dae Diakitè a su minutu chentu, est essidu nòdidu a pitzu, cussu chi fintzas a pagu tempus pariat unu pèrdidu coràgiu. Tando ant signadu Diakitè cun Mastinu. “Vecchia guardia”. Dae sa chisina si podet torrare a nàschere.
Semper prus nèula in sa sèrie D sarda
Isetende su sole pro liberare su chelu, s’Òlbia torrat a bìdere unu raju de lughe. Gràtzias a una rete de Ragatzu, balanzat unu puntu in su campu de su Valmontone, sa tertza de sa classìfica. Puntigheddu pro su Budoni, intro de domo, 0-0 contras a s’Ischia e pro su Monastir 2-2 in su de Montespaccato. Perdet su Sarrabus in domo sua, 1-3, contras a su Atletico Lodigiani e su Latte Dolce 1-5 in su de Monterotondo. Sa prima de sas sardas est semper su Budoni, bene sestada in sa positzione nùmeru chimbe de sa classìfica.
Mario Bua Capitta, Amistade (cun su contivizu de s’Istituto Chircas)
