Il racconto del weekend calcistico isolano in limba sarda a cura degli amici di Amistade.
Su Casteddu si firmat in s’infermeria
Sos sardos, cun 7 òmines malàidos, in su primu tempus proant a difèndere unu puntu pretziosu in sa partida de su disisperu mannu pro sos pulliesos. Su disizu est cussu chi in su segundu tempus si potat acontzare su bàrriu, comente est capitadu dae pagu contras a su Verona, ma s’istòria non torrat mai a sa matessi manera. Sos pulliesos chi como isetant sa partida cun s’Inter non cheriant pèrdere ma mancu paregiare, e s’est bidu dae luego e totu. Ma su disizu non bastat, e in su segundu tempus Gandelman, a su minutu 64, trampat sa difesa sarda e de conca mudat una partida chi pariat nàschida pro su 0-0. Obert si faddit sa rete de su parègiu a duos metros dae Falcone e ses minutos in fatu, comente càpitat àteras bortas meda, a rete faddida torrat sa rete leada. Tando Caprile si trobogiat a sa sola e Ramadani non perdonat: Cagliari 0 e Lecce 2. Como bastat de pèrdere duas partidas una in fatu a s’àtera pro torrare a intendere allutos sos fogos de s’inferru. Pensende chi duas iscuadras parent già cundennadas a sa sèrie B, pro sa tertza si cumprendet bene chi at a èssere una gherra manna finas a sa fine. Su Casteddu devet chircare de bìnchere contras a un’iscuadra mai domada, e a sa mala sorte puru.
Sos tataresos binchent in domo anzena: Sambenedettese – Torres 1-2
Ismentigadu su parègiu in domo de s’Ascoli, cun duos puntos pèrdidos a su minutu 95, sos sardos, bi torrant a proare in su de San Benedetto del Tronto e tando su coràgiu pagat bene. Bi pensat Sorrentino, pro sa segunda domìniga una in fatu a s’àtera a violare sa rete, gràtzias a un’isconchinada galana. Est su minutu 11. Sa Sambenettese torrat in partida solu cun unu rigore, signadu dae Eusepi pro sos marchigianos a su minutu 67. Est tando chi sa Torres ponet in campu s’atza connota, cussa bida e connota in sos annos colados. Greco at furriadu a domo s’identidade binchidora. Pustis si podet bìnchere o pèrdere, ma semper cun coràgiu e dignidade. Como tocat de aguantare, ca sa sarvesa no est prus unu bisu sena contu ne cabu, ma una possibilidade bera.
Die lughente pro su Monastir in sa sèrie D sarda
Su Sarrabus binchet 2-0 in domo de s’Anzio e su Monastir, chi como est tertza in sa classìfica, muiat 3-2 su Latte Dolce. Su Budoni balanzat unu puntu pesudu in domo de sa Nocerina. S’Olbia tra àrbitros e mala sorte torrat a pèrdere in domo sua, pro Terranoa custu est “s’annus horribilis”, un’annu de ismentigare.
Mario Bua Capitta, Amistade, in contivogiu cun Istituto Chircas
