Il racconto del weekend calcistico isolano in limba sarda a cura degli amici di Amistade.
Casteddu: unu raju de lughe rupet su purgadòriu
Su Casteddu giogat male, Cremona cumandat su primu tempus, pagu male ca non signant rete peruna. Una rete tando fiat de fàghere e l’ant fata sos sardos: Mendy bidet Ze Pedro e li donat sa bròcia, Ze Pedro ponet in mesu unu cumbidu galanu in s’ala mànchina de s’àrea minore, in ue Esposito si faghet agatare prontu, chi cun sa conca non perdonat. Tres res, tres pitzinnos de su Casteddu nou chi est naschende. E non sunt solos, sunt in meda. Namus chi su traballu de Pisacane, mastru pitzinnu isse puru, est donende frutos bonos. Como però non giuat a torrare a si dormire,ca nos devimus galu sarvare.
Sa Torres ponet in sa bèrtula, unu puntu pretziosu…
In domo sua s’iscuadra sarda, binchet in manera nòdida, ischidende su sonnu de sos livornesos e s’acùrtziant gasi a sa sarvesa dereta. In domo de su Pineto, cun Zecca e Zambataro indimoniados, si fiat pòdidu bìnchere puru, ma sena ismentigare chi sos abrutzesos sunt sestos in classìfica cun 50 puntos. Sa Torres nde tenet 35. Como ischimus chi in su tempus benidore si podet pensare a unu mezoru, pro lòmpere a sa sarvesa dereta. Como ischimus puru chi si podet fàghere.
Sèrie D sarda: s’Òlbia buscat podda manna
S’ Òlbia perdet 4-1 in domo de sa cabulista Scafatese, e como s’arriscu de nche falare est semper prus mannu. Su Budoni “pirata” binchet 0-1 in domo de su Sarrabus. Puntigheddu lanzu pro su Monastir in domo sua, contras a su Trastevere. Bene meda imbetze su Latte Dolce, chi binchet 4-0 cun sa Palmese.
Mario Bua Capitta, Amistade (cun su contivizu de s’Istituto Chircas)
