Il racconto del weekend calcistico isolano in limba sarda a cura degli amici di Amistade.
Su Casteddu atrivit e balanzat un’àteru puntu pretziosu
Mancat Mina e sa difesa sarda pianghet azigu, non ruet in ora mala ca su bardianu si narat Elia. Tocat de nàrrere puru chi s’àrbitru non fiat in die lughente, duos rigores negados, cando su var pariat pagu abbistu. A sa fine b’ant dèvidu pensare sos pitzinnos, chi ant bogadu a pizu atza e balentia: prima Idrissi, chi cun un’isbatzinada de mànchinu at ammentadu tiros de àteros tempos. Pustis bi pensat Felici, intradu in su segundu tempus, chi faghet totu a sa sola e tenet su 2-2, in “zona Pavoletti”. Namus puru chi non sunt mancadas sas faddinas, ma si podent perdonare, ca pitzinnos puzones comente Liteta agatant logu in campu e donant bona ispera pro su tempus benidore. Imparare tando e pensare a gioja, ca a sa Domus acudit su Sassuolo, no at a èssere fàtzile, ma tocat de bi proare, ca si podet torrare a bìnchere.
Unu puntigheddu pro sa Torres in domo de sa neopromossa Guidonia
Forsis sa brigada tataresa est torrada. Sos sardos, chi non signant dae chimbe domìnigas ant chircadu sa bia de sa rete pro una oreta bona, pustis si sunt dèvidos difendere pro lompere a su 0-0. Aprovada sa difesa a bator, abarrat su problema de un’atacu chi non punghet. Cun sa furriada in campu de un’òmine comente a Mastinu, su mezoru s’est bidu, paris cun carchi ocasione in prus. Custu podet carrare una lughe noa, como chi acùrtziat s’ierru.
Serie D sarda, s’Òlbia binchet su derby de sa Gaddura
In Budune est torrada sa die de Ragatzu, 2-3 in una partida gherrada fintzas a sa fine. Sa Costa Orientale Sarda, s’acùrtziat a su cabu de subra, tertza cun 16 puntos, gràtzias a sa bìnchida pro 2-0 contras a sa Palmese. Su Monastir giogat bene meda, ma perdet in Ischia. Perdet in domo sua su Latte Dolce, no bastat sa rete de Loru, contras a sas duas fatas dae su latziale Lorusso.
Mario Bua Capitta, Amistade (cun su contivizu de s’Istituto Chircas)
