Il racconto del weekend calcistico isolano in limba sarda a cura degli amici di Amistade.
Unu Casteddu a cara arta in su campu de su Torino
Su Casteddu penat ma non pranghet. Mancat mesa difesa e pustis s’àrbitru non si la sentit de donare unu rigore in domo anzena. Nch’aiat dèvidu bogare a foras finas su bardianu, essende isse s’ùrtimu òmine. Tropu, cando fiant colados solu pagos minutos dae s’incomintzu. Posca de carchi minutu, su trau nos torrat sa “cortesia” e a su primu tiru in porta signat sa rete de su 1 a 0. Paret cosa fata. Torrada pariat, sa malasorte connota. Cantu istant sos piemontesos fatende festa, mastru Pisacane dae sa panca, imbiat in campu signos nòdidos a sos giogadores suos. E totus cumprendent bene, chi niunu si devet fàghere bìnchere dae sa tristura. Sos òmines tando, incomintzant a gherrare comente si tocat, fintzas a cando Prati, ismentigada s’amargura de sa panca, si lampat che farchitu coi nieddu intro a s’àrea anzena, aparinende sa partida cun lestresa, in antis de agabbare su primu tempus. In su segundu tempus sos sardos agatant sa balia connota, fintzas a si fàghere a meres de su campu, e a su minutu 66 bident su tribuliu premiadu. Bi pensat Kilichsoy, pitzinnu turcu e como gherradore bizantinu de binti annos a pònnere a frutu su cùmbidu donadu in sa mesania, dae unu de sos mastros sardos: Deiola. Kilichsoy tucat a sa sola, si còdiat mesa iscuadra torinesa, non bidet cumpanzos lìberos in logu perunu, ma abbàidat solu sa porta, una e manna, e che pasat sa bròcia in ue su bardianu de domo non podet lòmpere. Non paret beru, est una rete de ammentare. Duas retes in duas partidas ebbia giogadas comente titulare. Ma s’istòria abarrat in sa memòria e como devimus pensare a su Milan, su duos de su mese ch’intrat e de s’annu chi benit.
Bonas fines e menzus printzìpios
Mario Bua Capitta, Amistade (cun su contivizu de s’Istituto Chircas)
