Sa Torres perdet 2-0 -, in domo cun s’Arezzo, ma mustrat su carattere de chie at imparadu, andende a binchere in domo antzena, sa chida in-fatu 3-2, remuntende duas bortas sos gherradores toscanos. Greco narat chi devimus abbarrare a pè in terra, ma a conca alta, abbaidende semper su cabu ‘e subra….Menichini, mastru nou de su Pontedera, pensat chi sa torres est’istada fraigada pro che pigare in serie B. Seguru chi s’iscuadra est de cabu ‘e subra e su progetu naschet bene e dae meda tempus. No giuat a s’illudere, ma pius pagu ancora de si faghere mancare s’istìma pro sa propria balentèsa.
Olbia perdet unu trenu ma torrat a isperare, gratzias a su puntigheddu balantzadu in domo de sa capolita laziale, Cassino. Puntu bonu ma unu pagu ranchidu, si pensamus chi colados 7 minutos sos sardos fit innanti 2-0, gratzias a De Grazia e Staffa. Cassino at bogadu tando s’atza chi l’at donadu su primu logu in sa classifica, e b’at pensadu Abreu a apparinare. Sa doppietta sua gighet a su 2-2. Totu in 26 minutos, cussos de su primu tempus. Totu faghiat tando pensare a un’àtera rutta mala, a unu destinu ranchidu, ma sos piseddos nostros ant agguantadu, donende anima, coro e forsis s’ischire de unu mastru nou, s’argentinu Gatti. Olbia abbarrat urtima in classifica, ma como potet isperare…
Isetende su trau rujiu, Casteddu no potet immentigare chi s’annu coladu, nos ant poddadu 2-1, in su Domus matessi. Sos fatos narant chi sos piemontesos puntant torra su cabu ‘e subra, ma sos sardos cherent ponnere a frutu omines, famine e esperièntzia, pro si salvare, chena isettare s’urtima die.
Mario Bua Capitta, Amistade
