Il racconto del weekend calcistico isolano in limba sarda a cura degli amici di Amistade.
Su Casteddu perdet a su minutu 95, in domo de sos campiones de Itàlia
Cando Anguissa at signadu sa rete de su 1-0, a partida isposta, tando amus bidu Conte morende de iscàssiu, comente chi aeret bìnchidu sa copa de su mundu. E custu narat totu. Domìniga colada amus balanzadu unu puntigheddu a su minutu 94, in su Santu Pàulu, cun 50.000 tifosos indemoniados, nd’amus pèrdidu un’àteru. Su fùbalu traballat cun su “Karma”. Pratu chi essit, pratu chi torrat, narat su connotu nostru. Ma semus giòmpidos solu a sa segunda gara, no giuat a oriolare meda, ma averiguare emmo, isperiare intro a s’esperièntzia colada, pro cumprèndere bene sos signos chi preguntant su mezoru a agatare su mèdiu a sa tucada de su bomber, chi in antis cun sa Fiorentina e posca cun su Nàpoli, est azigu mancadu. Ma Giulini e Pisacane custu l’ischint e de seguru non cherent pèrdere sa sèrie A.
Torres perdet sa gara ma sarvat s’onore
Colada sa bona tucada, sos tataresos de sa Torres, torrant a pee in terra in su campu caldiadu de su Campobasso, su primu e beru esàmine de custu campionadu. Ite nos contat, tando s’esàmine molisanu? Narat chi su Campobasso at bìnchidu sena furare nudda, cun Bifulco malu a firmare, ma sa Torres in su segundu tempus at atzesu sa lughe connota, cun atza e coro mannu, resessende puru a aparinare, cun Musso a su minutu 65. Pro pagu tempus però. De seguru non podet pensare de bìnchere su girone o giòmpere a su segundu logu de sa classìfica, comente in s’annada colada, ma si achipit a rupire a su mancu a sos play-off cun bonu briu, tando podet èssere s’annu sou.
Mario Bua Capitta, Amistade
