Il racconto del weekend calcistico isolano in limba sarda a cura degli amici di Amistade.
Casteddu bìnchet còntra su Lecce, in domo issoro
Cando su Lecce at signadu sa rete de su’1-0, cun Gabriel colados bator minutos, tando su pensamentu est tucadu a s’annu passadu, cando sos pugliesos, cun una retighedda ant tancadu sa gara… Ateros tempos. Su Cagliari bidu oe in campu si la gherrat cun totu, non timet niunu e in campu totu ischint ite faghere. E sunt sete puntos in sas primas bator garas, cosa chi non capitaiat dae sos tempos de Gigi Riva. Subra sa cadrea manna, pasat como Pisacane. Ma Pisacane lu connoschimus, isse est òmine balente e abistu puru. Isse ischiat de Belotti e ischit bene puru, chi sas isbatzinadas su giovane Esposito, no podent semper abbojare sa linna de su palu…
Torres sarvat sa gara ma pèrdet sa cara
B’at pensadu Musso, a furare su tempus a sa defensa istransa, pro signare a su minutu 42, e fàghere a cumprendere a sa favorida Ternana de Liverani, chi Tattari non timet. In sa Torres est tando mancadu su bomber bonu a tancare sa gara, faeddamus de Fischnaller, Mastinu, malafortunadu, ma pius de totu su coro pro sighire a gherrare, una orta leada sa rete de Dubbickas, c’at aparinadu su risultadu. Luego torrat Mastinu, ma forsis no bastat, si cherimus abbaidare a su cabu de subra.
Serie D sarda
Binchent sos terranovesos, cun retes de Ragatzu e Deiana Testoni. Paret siat bennidu su tempus de che colare insegus s’esperientzia isvitzera…bìnchet puru Sassari Calcio Latte Dolce’ in su campu de s’Atletico Lodigiani. Pèrdent Monastir e Budoni, 1-1 tra C.O.S. Corrabus e Ischia. Tando Sassari Latte Dolce, Monastir e Olbia, isperiant su cabu e subra. Ma su campionadu est solu a incomintzu.
Mario Bua Capitta, Amistade
