Il racconto del weekend calcistico isolano in limba sarda a cura degli amici di Amistade.
Su Casteddu dat in donu sa partida a sa Lazio
Su Casteddu perdet sa segunda partida in fatu a s’àtera contras a un’iscuadra chi giogat cun ischire e balia, comente sa Lazio e chi aprofitat de onzi faddina, ma prus de totu de sa sicagna de sos sardos in su cabu de subra, in ue niunu signat e nen ponet a frutu su giogu de sa mesania. Carchi cosa bona l’amus bida, mancat però su bomber e s’esperièntzia. Tando nos isetat su Como chi dae iscuadra minore abbàidat a sa champions, ca issos sunt resessidos a essire dae sos fogos de s’inferru a in ue sos sardos si sunt acurtziende. Su perìgulu de sa sèrie B non devet però carrare oriolu ca galu si podet mezorare, semper a cara manna, pro un’àtera sarvesa.
Sa Torres torrat a pèrdere e mastru Pazienza narat adiosu a sa Brigada Tataresa
Non b’at nudda ite a fàghere pro sos sardos contras a su Carpi, chi nd’essit binchidore dae su Vanni Sanna, gràtzias a unu rigore donadu in su segundu tempus e signadu dae Cortesi. Tebiosu paret su mezoru, prus de totu in su primu tempus, ma non bastat pro pònnere mèdiu a sa crisi prus manna de sos ùrtimos annos. Sanna leat s’iscuadra a manu tenta pro proare a lassare s’iscuru prus nieddu.
Nèula in sa sèrie D sarda
Solu su Budoni torrat a domo cun tres puntos de oro dae su de Montespaccato, cun sa rete de Madero Sonora. Bonu su parègiu pro 2-2 de su Sassari Latte Dolce in domo de s’Iscafatese. Parègiat pro 2-2 finas su Monastir, in domo sua però, contras a su Flamìnia. Nudda ite a fàghere pro su Sarrabus, chi perdet 4-2 in domo de s’Albalonga. S’Òlbia signat a primu cun Biancu, ma non resessit a mantènnere sa bìnchida, contras a s’Ìschia Calcio, e sa partida agabbat 1-1.
Mario Bua Capitta, Amistade (cun su contivizu de s’Istituto Chircas)
