Il racconto del weekend calcistico isolano in limba sarda a cura degli amici di Amistade.
Su Casteddu non podet nudda contras a sos campiones.
Sos sardos giogant a cara arta in sue Torinu. Palestra si bufat a Kostic, comente una tatza de abba, passat sa bròcia in s’àrea minore e Esposito non bi pensat duas bias, cun sa calma de unu giogadore mannu nche la faghet pasare in intro de su sacu. Esposito e Palestra, parent in sèrie A dae una bintina de annos, ma issos sunt solu pitzinnos puzones… Ma sa cuntentesa durat pagu. Coladu nemmancu unu minutu, e Yildiz profetat de una difesa galu abbucalotada dae sa prima rete, pro aparinare sos contos. Yildiz, semper isse, cando su primu tempus pariat agabbadu, signat sa segunda rete a su minutu 46 e tancat sos contos in totu: Juve 2 e Casteddu 1. Sos sardos sighint a giogare cun ischire e balia, ma sos piemontesos tancant sa porta fintzas a sa fine. Abarrat s’amargura pro una partida chi si podiat a su nessi aparinare e pro un’àtera diretzione de gara suta a sa sufitzièntzia: carchi rigore negadu, chimbe ammonidos pro su Casteddu e unu solu pro sa Juve. Ma sa gara fiat tosta pro totus… nois nos preguntamus tando, ma in unu campionadu in ue b’at iscuadras chi lassant in campu deghe istranzos subra a 11 giogadores, non si podet pensare a un’àrbitru internatzionale?
Sa Torres pasat ca su Rimini non podet prus giogare.
Sos Sardos, como, ant una chida in prus acontzare su bàrriu Tataresu, sena ismentigare chi iscuadras comente sa Torres, devent pensare puru a su dinari impitadu pro mantènnere su professionismu: Rimini docet e Olbia puru.
In sa sèrie D Sarda: su Budoni binchet su derby.
Su Budoni torrat a bìnchere intro de domo sua, 4-0 contras a su C.O.S. Sarrabus e s’acùrtziat a 1 puntu dae su segundu logu de sa classìfica. S’Òlbia aparinat 1-1 contras a sa prima de sa classe Scafatese e isetat novas bonas dae s’assòtziu. Bene meda faghet su Sassari Latte Dolce, chi binchet 1-0 in domo de sa Palmese, male su Monastir, chi benit poddadu 4-1 dae su Trastevere Calcio.
Mario Bua Capitta, Amistade (cun su contivizu de s’Istituto Chircas)
