Il racconto del weekend calcistico isolano in limba sarda a cura degli amici di Amistade.
Bona tuccada e bìnchidas pesùdas pro Torres e Casteddu, in sa prima gara de s’annada nova
In su numene de sa gioventude, sos sardos rùpent su primu muru de sa Copa Italia. Mastru Pisacane propònnet ideas novas, e Cavuoti, pitzinnu pesàdu in domo, chi at fatu iscola in serie C, sinnat dae sos 11 metros, sa rete chi donat s’àidu pro un’àtera gara de copa. Sa gara de oe nàrat a boghe manna cantu tribagliu e tribuliu b’at galu de fàghere pro sa serie A, custu est seguru. Abarrat però mannu su desigiu e sa gana de bisare.
Sos òmines de Micheli Pazienza, mastru nou de sa Torres, giòmpent a colare su prima de Copa Italia. Ischeada s’armagura de su campionadu coladu, pèrdidu a sos playoff, c’ant lampadu in-foras un’iscuàdra nòbile comente su Livorno, cun retes sinnadas dae Lunghi e Musso, 2-1. Marchesi at sinnadu pro sos toscanos, sena donare pensamentos meda a sa brigada tattaresa. Beru chi cust’annu ant a mancare giogadores pesùdos, comente Fischnaller e Scotto, ma sa bàlia nova, pàret bona meda.
Mario Bua Capitta, Amistade
