Il racconto del weekend calcistico isolano in limba sarda a cura degli amici di Amistade.
Su Como furat duos puntos a su Casteddu
Est su minutu 65 e su Sassuolo at signadu su 2-0 in sa Domus, cun Pinamonti. S’arbitro ruet in “revisione var” ca a s’incomintzu de sa matessi atzione, Idrissi at leadu isbatzinada manna dae Volpato, chi posca at donadu sa bòcia a Pinamonti. Su var, tando at nadu chi su corpu no fiat gasi malu. Rete donada, su risurtadu finale lu connoschimus totus. Sàpadu in su campu de su Como, Palestra balanzat sa bròcia in sa mesania, la donat a Esposito, chi mudat a s’àtera ala pro Felici, dae Felici a Gaetano, chi si lìberat de s’òmine sou e pintat unu cross galanu in sa mesania de s’àrea, Palestra proat a crossare, sa bròcia agatat s’anca de s’ispagnolu Valle e rupet sa lìnia de sa rete. Su Como preguntat su var e var est. Current sas figuras de su filmadu in chistione. Su telecronista narat chi su fallu cuntestadu a Palestra in sa mesania de su campu fiat unu “semplice contrasto”. Ma s’àrbitru chi a incomintzu aiat balidadu sa rete no la pensat gasì. S’àrbitru cun su micròfonu annùntziat “Il numero due del Cagliari commette fallo, goal annullato”. Est festa manna in sas tribunas. Pustis Morata iscudet a Mina a tesu dae sa bròcia e preguntat sa sostitutzione. Ammonimentu e bia. Ma sa règula non faeddaiat de espulsione? Forsis s’assòtziu devet pensare carchi cosa pro difèndere s’iscuadra, ca incomintzat sa passèntzia in su pòpulu a mancare…
Sa Torres torrat a su connotu: benit giamadu Greco
Nudda ite a fàghere pro sos sardos contras a su Carpi, pagu ite a fàghere finas contras a su Ravenna, chi cheret torrare in sèrie B. Mancuna rete dae prus de sete garas. Ma in Ravenna s’iscuadra ghiada dae mastru Sanna at donadu sinnos de mezoru e de rimèdiu. Seguru chi Ravenna non fiat su menzus logu pro torrare a fàghere puntos, ma como tocat torra a Greco, chi est galu suta a cuntratu e disizosu de riscatu. Ca semus luego ùrtimos e devimus aunire sas fortzas cun s’assòtziu, cun Tàtari totu, ca sa Torres non mèritat s’iscurigore de sa sèrie D.
Nèula in sa D sarda
Budoni torrat a domo cun tres puntos pesudos dae Monterotondo, cando Sassari Latte Dolce binchet 3-1 contras a s’Albalonga. Òlbia e Sarrabus aparinant, mentres su Monastir perdet in domo sua contras a sa prima de sa classifica, sa Scavatese. Su Budoni che colat s’Òlbia in classìfica e giompet a 18 puntos, chi balent sa cuinta positzione.
Mario Bua Capitta, Amistade (cun su contivizu de s’Istituto Chircas)
