Il racconto del weekend calcistico isolano in limba sarda a cura degli amici di Amistade.
Est Nadale e su Casteddu donat duos puntos a su Pisa
E puru amus agatadu sa balia connota, solu cando s’amigu Tramoni nos at donadu unu tzafu meritadu. Solu tando, però. Rodriguez, cunfirmat sa resa de sos mannos, e devet tuponare sos bucos lassados abertos dae Mina, chi cando no istat bene non devet giogare. Paris cun Sant’Elia agiuant a non leare sa segunda rete. Posca bi pensant Folorusho e Kilicsoy, giogadores noos chi ant cojuadu s’ànima sarda. E tando pariat bella e fata, ca sos pisanos atambainados atacaiant a sa tzega, lassende tancas abertas e froridas, chi sos sardos non sunt resessidos a onorare. Esposito prima e Mazzitelli da poi, podiant tancare sos contos, chena problemas, ma no l’ant fatu. Sa lege de su logu e de su mundu intreu in onzi logu, sa prus antiga de su fùbalu, narat chi chie si còdiat sos benes donados, a pustis pranghet.
Sa Torres ponet in sa bèrtula unu puntu pretziosu
Sa Torres aiat àpidu meritadu de bìnchere. Ma aiat finas pòdidu pèrdere, ca s’Arezzo est segunda in classìfica e in campu amus bidu pro ite. Sos sardos abarrant ùrtimos a sa fine de su girone de andada, ma donant lughe e lassant unu signu nòdidu: in custa sèrie C no est segunda a niunu. S’iscuadra at proadu a bìnchere fintzas a s’ùrtimu minutu e sa partida no at àpidu meres. Cun custa atza e cun custu coro, su 2026 podet abèrrere a unu campionadu nou pro sos sardos.
Sa sèrie D abarrat iscurosa pro sos sardos
Su Latte Dolce binchet 4-1 contras a su Budoni e su Sarrabus 1-0 in Terranoa contras a s’Olbia. Perdet su Monastir in domo sua, 1-2 contras a sa Palmese. Sa Scafatese semper prus sola colat 3-0 contras a s’Albalonga e abarrat sola in su cabu de subra de sa classìfica. Sa prima de sos sardos est semper su Budoni, chi est galu cuinta cun 28 puntos, e abbàidat sa capu lista, semper dae prus a tesu.
Mario Bua Capitta, Amistade (cun su contivizu de s’Istituto Chircas)
