Il racconto del weekend calcistico isolano in limba sarda a cura degli amici di Amistade.
Casteddu – Milan 0-1
Su Casteddu agatat su cabu bonu e pro totu su primu tempus nche tancat sos milanesos, meres de su campionadu, intro a su cuile issoro. Non paret beru. Devimus pensare puru chi mastru Mina devet abarrare in sa panca. E puru a fàghere sa partida no est s’iscuadra chi abbàidat dae su primu logu de sa classìfica a cussa de su cabu de giosso, cussa chi podet bantare sa “legione istranza” prus manna de totu su campionadu. Chena sas faddinas de Prati e Palestra, su Casteddu aiat pòdidu tancare su primu tempus cun duas retes in sa bèrtula. In su momentu de signare, a sos pitzinnos est mancada s’atza de sos gherradores. Tropu bonos. E Allegri? Isse pariat orioladu ma non tropu. Che bonu matzone betzu, isse ischiat bene chi sos sardos aiant dèvidu pagare unu contu rànchidu meda pro sas ocasiones pèrdidas. Tando, su Casteddu giogat cun s’iscuadra prus giòvana de su campionadu, e s’esperièntzia e su coro de Mina e Deiola est de importu mannu, comente cussa de Modric pro su Milan. Ma Modric fiat in campu. Como torramus in A2, prontos a tucare a Cremona cun sa bàlia connota.
Sa Torres torrat a bìnchere a pustis de bator meses, Pontedera covecadu dae Di Stefano
Sos sardos agatant su bomber disizadu? Si est gasi, custu podet mudare su caminu intreu e mantènnere deretu a abarrare in C, comente Tàtari mèritat. Su campu at contadu, chi sa Torres at òmines, giogu e si agatat s’identidade pèrdida de sos annos colados, gràtzias a sa balia de noos, comente Di Stefano, ma puru pro mèritu de giogadores connotos comente Mastinu, cando resesset a allumare sa classe superiore. Como non giuat a rùere in illusiones malas, ma su 2026 podet abèrrere una pàgina noa, in sa sorte de sa Brigada Tataresa.
Die pagu lughente pro sa sèrie D sarda
Isetende sos derbis, su Monastir contras a su Budoni e su Latte Dolce contras a su Sarrabus, devimus abbaidare sa ruta terranoesa de s’Olbia Calcio 1905, chi perdet in domo sua contras a s’Albalonga. Sa coa de sa classìfica est galu a tesu, ma sa crisi est manna a beru. At pagadu su mastru chena neghe, ma totu ischimus chi s’assòtziu devet agatare unu rimèdiu, ca Olbia mèritat de torrare a bisare.
Mario Bua Capitta, Amistade (cun su contivizu de s’Istituto Chircas)
