Il racconto del weekend calcistico isolano in limba sarda a cura degli amici di Amistade.
Note Sarda pro Torres, Casteddu e Terranoa
Pisacane est òmine balente, como chi mancat Belotti, amus a bidere si s’ànimu e sa balentia abbastant. Totus ischimus chi s’Inter est de un’àteru livellu, e chi sa sèrie est partida in duas categorias diversas: A1 E A2. Belotti, bènnidu dae s’A1, aiat pòdidu agiuare sos sardos a incurtziare sa distàntzia. Ma Belotti, cun su ghenuju malefadadu, at ispostu pro custa annada e forsis pro semper… isperamus chi nono. Seguru est chi su Casteddu at su dovere de l’isetare. Borrelli podet nàrrere sa sua, si agatat s’atza pro bortulare sa porta de sa contra. Tando luego diat dèvere torrare Luvumbo, paris cun Felici podent oriolare sa difesa anzena. E forsis intro de domo b’at puru pitzinnos chi isetant su destinu.
Sa Torres chircat s’identidade pèrdida
In su Vanni Sanna bìnchida meritada pro s’Àscoli, a die de oe tertza in sa classìfica de sa sèrie C. Ma sa Torres s’annu coladu, a die de oe, fiat segunda e pensaiat a sa sèrie B. Oe chi est oe, su pensamentu bolat a sa sarvesa. Mancant Fishnaller e mancat su capitanu, est beru. E Mastinu, galu male fortunadu, a sa sola non podet mudare su destinu de s’iscuadra. A ghennarzu pro sighire a gherrare, e abbaidare a su cabu de subra, tocat de acontzare su bàrriu.
Sèrie D sarda
Die iscurosa in sèrie D, puru pro sas iscuadras sardas. Binchet solu su Sassari Calcio Latte Dolce, parègiat su Budoni in domo sua, contras a s’Albalonga, perdent totus sas àteras, a incumintzare dae s’Òlbia, mancari fiat fuida 1-0 cun sa rete de Ragatzu. Beru est chi su campionadu est solu a s’incomintzu, ma est ora puru de pensare a su tempus benidore.
Mario Bua Capitta, Amistade
