Il racconto del weekend calcistico isolano in limba sarda a cura degli amici di Amistade.
Sant’Elia lassat colare su destinu: Casteddu – Gènoa 3 a 3.
Su Casteddu agatat s’atacu ma perdet sa difesa. In su Domus, amus bidu luego chi Mina no fiat in die de gràtzias, forsis su biàgiu longu dae s’Amèrica, forsis sas limbas malas de sos tzeracos de sos giornales italianos, forsis ambas duas sas cosas, ant dadu fastizu a su mastru de sa difesa sarda. E fortuna manna chi Colombo no at bidu premiada sa bravura sua: prima Caprile, pustis su fuorigioco chirùrgicu, no l’ant permissu de aparinare sa gara. Ma su destinu fiat in caminu e cando su giogu pariat ispostu, su destinu at torradu a bussare, pro sa tertza bia: su tiru de Aaron Martin fiat unu cross faddidu, ma sa bròcia trazada dae una fortza pagu connota nch’at brincadu, tramposa, su bardianu prus balente de sa sèrie A, Elia Caprile, chi at fine partida at preguntadu iscusa a sa zente de sa curva. Ma non b’aiat bisonzu. Caprile abarrat su fizu seberadu de sa domus sarda. Como tocat de tucare a Torinu e pustis isetamus sa Roma in Casteddu. Garas malas, chi donant oriolos… Ma no giuat a disisperare e a tìmere, mastru Pisacane ischit comente acontzare sa difesa e Borrelli cun Esposito est un’atacu nou, chi faghet tìmere totu sa sèrie A.
Sa Torres perdet in Livorno: cun su primu rigore dubiosu
Sos Sardos mantenent bene meda su campu, mancat su bomber e su nùmeru de sas retes signadas in totu s’annada fintzas a como narant totu. Su Livorno at meritadu sa bìnchida, forsis, ma sa Torres at fatu una faddina mala, perdende una bròcia in sa mesania e l’at pagada bene, perdende 3-1. Duos rigores donados cun coro mannu a sos toscanos però…. S’àrbitro at abbaidadu finas su FVS, ma no at mudadu s’idea sua. Deviat èssere rigore ebbia. Ma namus puru chi sa diretzione arbitrale, in onzi contivinzu de giogu, non cheriat bida. Una birgonza. S’assòtziu arbitrale forsis no amat sa Sardigna, siat issa de su cabu de subra o de su de giosso. Forsis acollimus sas firmas pro preguntare un’arbitràgiu internatzionale pro sas partidas sardas. Diat èssere semper ora chi calicunu niat carchi cosa.
Die lughente pro sa sèrie D sarda
Su Budoni torrat a bìnchere in foras de domo, 2-0 in Valmontone e assestat su cuartu logu in sa classìfica, guidada dae sa Scafatese, cun sa Nocerina segunda a bator puntos, chi colat binchidora in Tàtari pro 3-0, contras a su Latte Dolce. S’Òlbia semper in crisi manna perdet 2-0 in domo de su Real Monterotondo. Sa C.OS. Sarrabus lassat in segus su Cassino Calcio 4-2 e su Monastir mujat su Anzio Calcio pro 3-1 e in pare a su Sarrabus si leat su sestu logu in classìfica, in una die chi si podet contare bona pro sas sardas de sa sèrie D.
Mario Bua Capitta, Amistade (cun su contivizu de s’Istituto Chircas)
