Il racconto del weekend calcistico isolano in limba sarda a cura degli amici di Amistade.
Su Casteddu torrat a su minutu 94, in sa prima gara de sa sèrie A nova.
Mastru Pisacane proponet ideas novas, comente pensaiamus e totus isperaiamus. E sa mesania sarda mantenet sena tribulia manna sa bàlia de cussa toscana, chi pro bona parte de sa gara devet pònnere fatu a sos òmines indimoniados de su Casteddu, Folorunsho prus de totu. De seguru mancat e at a mancare su bomber, semper chi sos piseddos ponzant a frutu su logu lassadu lìberu dae Piccoli. Seguru est chi s’iscuadra ischit e at a ischire de giogu e de coràgiu e chie a s’incumintzu setzet in panca, podet mudare sa sorte de sa gara in onzi momentu, incomintzende dae Gaetano, chi prima at proadu a signare de persone, e pustis, a su minutu 94, at donadu a Luperto una bròcia de oro, pro pòdere aparinare su resurtadu a 1-1. E Luperto no s’est fatu pregare meda.
Bona sa tucada pro sos tataresos de sa Torres, chi signant cun Zecca a su minutu 31, e domant sa furriada de su toscanos de su Pontedera, sena oriolos mannos. A dolu mannu Lunghi devet lassare su campu in sa parte finale de sa gara, in fatu a sa segunda ammonitzione. Pro custu at a mancare sàpadu 30, pro sa falada a Campobasso, cussu chi pro sos Sardos est su primu e beru esàmine de custu campionadu.
S’Òlbia, in sa segunda amichevole de s’annada, perdet 3-2 in domo de s’Ilvamaddalena. Bìnchida meritada dae sos isolanos de s’Ilva, ma dae Terranoa pigant a pizu sinnos de bonu isperu, giogadores comente Biancu e Ragatzu abarrant, Martens Van der Want forsis torrat…dae su connotu si podet nàschere a nou puru.
Mario Bua Capitta, Amistade
