Il racconto del weekend calcistico isolano in limba sarda a cura degli amici di Amistade.
Su Bologna torrat su Casteddu a pees in terra
Mancat Belotti, paris cun sa bona sorte chi at acumpanzadu sos sardos in terra friulana, tando abarrat su tempus pro imparare dae sas faddinas, ma de chircare puru sa balia pèrdida de sa prima die. Pisacane connoschet bene su caminu, como tocat a isse. Abarrant sinnos de bonu isperu: unu bardianu chi donat seguresa, Prati chi at fatu trèmere sa linna e su coro de sa difesa bolognesa cun un’isbatzinada chi nos at ammentadu a Pirlo, Palestra chi allumat sa partida onzi borta chi imbucat dae destra, Felici chi faddit ma signat puru, su fuorigioco no fiat su suo. Totus pitzinnos de iscuadra manna, cun su coràgiu e sa dignidade chi Pisacane connoschet bene. Tando podent donare frutos bonos, sena ismentigare una die de ammentare, solu pro imparare.
Sa Torres torrat a pèrdere, como sa sotziedade devet pensare a su rimèdiu
Su Forlì puru binnennat in su Vanni Sanna, 2-0 cun una rete pro cada tempus, tando sa passèntzia incumintzat a rùere e sa zente frùschiat. Custa borta sos tifosos tenent resone, ca dae s’aera de sèrie B si incumintzat a respirare cussa de sa sèrie D. Beru est chi su campionadu est galu longu, ma non si podet pèrdere àteru tempus.
In sèrie D sas sardas abarrant in sa mesania
S’Òlbia binchet 3-1 contras a sa Flamìnia, Tàtari perdet 2-0 in Ìschia, su Monastir parègiat 0-0 in domo sua contras a s’Atlètico Lodigiani, su Budoni parègiat in su campu de sa Palmese e su COS Sarrabus in domo de su Trastèvere. Su perìgulu pro como nch’est a tesu, ma sos sardos cherent bisare.
Mario Bua Capitta, Amistade (cun su contivizu de s’Istituto Chircas)
